Larunbat honetan, uztailak 21, Ehiza Laneko Txakur Lehiaketaren zazpigarren edizioa izango da, Urdulizko Udalak antolatuta. Beste behin ere, Mendiondo auzoan, zehatzago esateko Mentxakabasoko zelaietan, gasolindegiaren atzeko aldean, jokatuko dute txapelketa. Goizeko 9etan hasiko da eta arratsaldeko 3ak inguruan amaitu. Parte hartzeko aukera zabalik izango da azken unera arte: lehiaketa hasi arte izena eman ahal izango da, zelaietan bertan. Txakur lehiaketa hiru kategoriatan egongo da banatuta. Horietako bik parte hartuko duten txakurren arrazen arabera daude antolatuta. Horrela izanik, hauek izango dira kategoria horiek: ireki kontinentala eta britainiarren irekia. Hirugarren kategoria bertoko txakurrentzat izango da, eta ez du bereizketarik egingo kontinentalen eta britainiarren artean. Argazkia: © Urdulizko Udala.
Bizkaiko Ehiza Federazioko epaile batek kalifikatuko ditu txakurrak. Kategoria bakoitzeko lehenengo hirurek saria izango dute. Txakur irabazlearen jabeak honakoa jasoko du saritzat: txaleko bat, kartutxo-kutxa bat, pentsu-zaku bat eta lehiaketaren irabazle gisa egiaztatzen duen garaikurra. Gainera, bertako parte-hartzaile guztiek opari bana jasoko dute, honakoa: kartutxo-kutxa bat eta pentsu-zaku bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun