2008ko azaroan inauguratu zuten Arboretum, eta 14 hektarea hartzen ditu, guztira, EHUren Bizkaiko campusean, Leioan. Dena dela, zenbait aldetan banaturik dago, eta hiru kilometroko errepide- eta bide-sare batek lotzen ditu aldeok. Leioa, Erandio eta unibertsitatearen beraren instalazioak ditu mugakide, eta hainbat erabilera ditu: publikoa, zientifikoa eta akademikoa.
1.700 zuhaitz
Guztira, 130 barietatetako 1.700 zuhaitz daude Arboretumen hiru guneetan, baita 600 zuhaixka, azalea sailak, errododendroak eta arrosa landareak ere. Gainera, herritar guztiek dute sarbidea. Hala, Arboretum "Autoktonoa" deritzonak, esaterako, Euskadiko habitat naturalak jasotzen ditu; "Asia eta Ekialdea" deritzona, berriz, Euskadikoaren antzeko klima duten beste lurralde batzuetako espezieak biltzen ditu; eta, azkenik, "Produktiboa" delakoan, egurra egiteko zein janaritarako espezieak daude.
Natura-gunearen egonkortasuna eta heldutasuna bere horretan iraunarazteko asmoz egin zuen Bizkaiko Foru Aldundiko Nekazaritza Sailak lankidetza-hitzarmena, eta, horri esker, beste zenbait hobekuntza ere etorri zaizkio: hobetu egin dira hango zelaiak, azpiegitura-lanak egin dira (urak biltzeko sistema, kutxatilak, ureztatze sistemaren ikuskapena, arekak) eta, gainera, lehen zuen baino balio handiagoa eman diote han askatu dituzten animaliek.
Halaber, Bizkaiko Fauna Basatia Sendatzeko Zentroan jaso eta oneratutako animaliak izan dira, hau da, Bizkaiko Foru Aldundiaren Gorlizko zentroan sendatutakoak.
Irene Pardo Nekazaritzako foru diputatuaren hitzetan, "mundua gero eta hiritarragoa dugun gariotan, zuhaitzek beste betekizun bat izan behar dute hirietan, eta horrexegatik jarraitzen dugu zuhaitzei merezi duten kudeaketa eta babesa ematen. 'Gerriko berde' esaten zaien horiek zeregin garrantzitsua dute animalien habitat gisa, eta Arboretuma laborategi bizidun moduko bat da, ingurumen-hezkuntzan oso baliagarria. Horrez gainera, hiriko biztanleen eta basoen artean dagoen arrakala murrizten laguntzen du".
Bizkaiko Foru Aldundiaren Nekazaritza Sailak, Euskal Herriko Unibertsitateak (EHU) eskatuta, segurtasun eremutzat jo du Leioako campusean duen Arboretum naturgunea. Foru erakundeak eta EHUk lankidetza-hitzarmen bat dute eremu horren ingurumena kudeatzeko eta bere kontserbaziorako, eta hezkuntza-, jolas- eta paisaia-helburuak betetzen ditu. Irene Pardo Nekazaritza Saileko diputatuak sinatu duen foru aginduak 83,9 hektarea ematen dio eremu horri babestuta egon dadin, hain zuzen ere, 3,12 hektarea Erandio udalerrian eta gainerakoak Leioan, Bizkaiko Foru Aldundiak jakinarazi duenez. Zehazki, hauek dira segurtasun eremuaren mugak: iparraldean, BI-2731 errepidea eta bide paraleloa, unibertsitateko instalazioei zerbitzua ematen diena; ekialdean, BI-647 errepidea; hegoaldean, Santimami auzorantz doan eta BI-647 errepidearekin lotzen duen bide asfaltatua; eta mendebaldean, BI-647 errepidean hasten den bide asfaltatua, auzo horri zerbitzua ematen diona. EHU arduratuko da segurtasun eremu hori seinaleztatzeaz. Seinale horiek hondo zuria eta letra beltzak izango dituzte, eta "Segurtasun eremua" aipamena izango dute. Adierazpen hau bost urterako da, eta epe horren buruan kartelak kendu beharko dira, Nekazaritza Sailak adierazpena berritu edo ezeztatu ezean. Hala egingo da interesdunek eskatzen badute edo erabaki hori hartzea gomendatzen duten arrazoiak badaude. Argazkian, Irene Pardo Nekazaritzako foru diputatua eta Carmelo Garitaonandia EHUko erretoreordea hegaztiak askatzen, artxiboko irudian / © EHU.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun