Dekretu berriaren arabera, hilaren 27an, 28an eta 30ean (jai-bezpera egunak), 1. taldeko ostalaritza saltokiek (dastalekuak, izozki-dendak, txurro-dendak....) 02:30ak arte zabaldu ahal izango dute; 2. taldekoek (tabernak...) 04:30ak arte, eta 3. taldekoek (pubak...) 06:00ak arte. Hilaren 29an eta 31n, 1. taldekoek 01:00ak arte zabalduko dute; 2. taldekoek 03:00ak arte, eta 3. taldekoek, 04:30ak arte. Terrazetan ohiko ordutegia izango da, 09:00etatik 23:00ak arte, baina ostiral eta jai-bezpera egunetan ordubetez luzatu ahalko dute zarratzeko ordua.
Txosnak
Txosnei dagokienez, Saninazioetan 5 izango dira, Jai Batzordearenaz gain, Telletxeko aparkalekuan 4 eta alkoholik gabeko beste bat Tangora Etxean; Romon beste 5 izango dira, gehi Batzordearena ere, eta guztiak Santa Eugenia kaleko aparkalekuan, Geltokiaren ondoan, egongo dira, jaietako agertoki nagusian; Portu Zaharrean beste 4 izango dira, Batzordearenaz gain, jai-eremu nagusian ere, zabalgunean, alegia. Guztiak herriko kirol taldek eta elkartek kudeatuko dituzte.
Kontzertu eta txosnena ez bezala, tabernen ordutegia luzatuko dute Algortako jaietan
Algortako ostalaritzako saltokiek ohi baino ordu eta erdi beranduago zarratzeko baimena edukiko dute San Inazio jaietan, uztailaren 27tik 31ra, tokiko Gobernu taldeak onartutako dekretuaren arabera. Hartutako neurri horren bitartez, Gobernu Taldeak ostalaritzaren sektorea lagundu nahi du, ekonomiak bizi duen krisi orokorra aintzat hartuta, “Getxon langile eta saltoki kopuru garrantzitsua biltzen duen sektore horrengan, bereziki, eragina baitu". "Halaber, herritarrek jaiegun hauetan ere atseden hartzeko duten eskubidea bermatzeko oreka bilatu nahi dugu”, adierazi du Koldo Iturbe Kultura eta Jaietako zinegotziak. Txosnen ordutegiari dagokionez, zuzeneko musika 02:30ean amaituko da jai-bezperatan eta 01:30ean astegun bezperatan; musika, oro har, 04:30ean amaituko da jai-bezperatan eta 03:30ean astegun bezperatan. Txosnak musika kendu eta ordubetera itxi beharko dira. Argazkian, 2010eko uztailaren 29an bere azken kontzertua eman zuen Ukabilkada taldeak, Algortako San Inazio jaietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun