Euskal Herriko Rugby Koparen bidez, Euskal Herria Kirolak errugbia ezagutarazi nahi du, baita haren jarduera sustatu ere. "Goi mailako ikuskizun bat eskaini nahi dugu, errugbia erakargarri bihur dadin haurrentzat, eta errugbian aritzeko ausartu daitezen". Ildo beretik, Bidasoaren bi aldeetako taldeen arteko harremanak indartu nahi ditu. Horren harira Esturok argi utzi du, abuztuaren 3ko ekimena partidu bat baino gehiago dela, Euskal Herriko errugbiaren besta eguna izan behar duela. Hori dela eta, ahalik eta talde gehien bilduko dituen jaia prestatzen ari direla aurreratu du, besta bat non nahi duten talde guztiek haien burua ezagutarazteko aukera izango duten. Ildo beretik, Euskal Herri Kirolaren bozeramaileak berretsi du koparen helburua Euskal Herriko talde hoberena izendatzea dela, baina benetako garailea Euskal Herriko errugbia izan behar dela.
Bestalde, Esturok gogoratu duenez, "Euskal Herria Kirola, Euskal Herriko kirolariok sortutako elkartea da, kirolarien bilgunea, Euskal Herria kulturala eta Euskal Herria kirolaria oinarri hartzen duena”. Haren logoak ere hori adierazten duela nabarmendu du, "ideologietatik haratago, kolore guztietako Euskal Herria" kontutan hartzen dituena, ligak, kopak eta txapelketak antolatzean.
Euskal Herria Kirola taldearen ekimenez, datorren abuztuaren 3an Euskal Herriko errugbi talderik onena izendatuko dute Kopa partida bidez. Halere, Euskal Herriko I. Rugby Kopan finala baino ez da izango, Aviron Bayonnais Rugby Pro eta Biarritz Olympique Pays Basque taldeen artekoa. Bi talde lapurtarrek Donostiako Anoetako estadioan joko dute, jai giroan, arratsaldeko 8etatik aurrera. Hortaz, Getxo Rugbyk parte hartu ahal izateko eta, kasurik hoberenean, irabazteko datorren urteko ediziora arte itxaron beharko du. Izan ere, Jon Esturo Euskal Herria Kirolaren bozeramaileak "etorkizunean kopa talde gehiagori ireki nahi" dietela azaldu du. Are gehiago, datorren urterako kopa izan daitekeen simulazio bat ere aurkeztu dute, bertan Baiona eta Biarritzez gain, Getxo, Gernika, Ordizia, Donibane Lohitzune, Hernani, Bera Bera, Maule, eta Nafarroa bezalako taldeak agertzen direna. Hala ere, Esturok argi utzi nahi izan du, abuztuaren 3ko jaia eta datorren urteko kopa antolatzeko, Euskal Herria Kirolak errugbi talde guztien ekarpen eta iritziak jaso nahi dituela. "Datozen urteetarako kopa egitura osoa antolatzeko ardura hartu nahi dugu denon artean", gaineratu du. Aurtengo Koparen finalerako sarrerak dagoeneko salgai daude www.barrabarra.eu webgunean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun