Bihar, osteguna, abiatuko da Atxabiribil hondartzan Sopela Pro Junior txapelketaren seigarren edizioa. Igandera arte, 21 urte baino gutxiagoko 150 surflari baino gehiago elkartuko dira bertan. Proba hori Europako zirkuituak dituen probetako bat da eta puntuagarria da gazte kategorian. Neskentzat sei probetako laugarrena izango da eta mutilentzat, aldiz, bostetik hirugarrena. Beraz, Sopelako proban sailkapen ona lortuz gero, txapelketaren nondik norakoak zehaztuak geratuzko liratezke. Hori dela eta, surflariek irabazteko eta galtzeko asko izango dute Sopelan. Herrian ospatzen diren surf eta bodyboard proba gehienak legez, probaren antolatzailea Peñatxuri surf elkartea da, Sopelako Udalaren laguntzaz. Bestalde, Billabong da probaren sponsor ofiziala, eta Euskal Herriko Surf Federazioaren kolaborazioa ere azpimarratu behar da. Ustezko faboritoak nabarmentzeko orduan, nesken kategoriari dagokionez, Leticia eta Loiola Canales ahizpa sopeloztarrek zer esana emango dute, euren herriko hondartzan lan txukuna egiteko asmotan aurkeztuko baitira. Garazi Sanchez getxoztarra izango dute lagun. Izan ere, euren helburua surflari frantsesen nagusitasunari aurre egitea izango da. Aurrez aurre izango dituzte Maud Lecar eta Johanne Defay, iazko Sopela Pro 11ko txapelduna. Horretaz gain, Hegoafrikako Bianca Buitendag egungo zirkuituaren txapeldunak eta sailkapenean hirugarrena den Reunion irletako Cannelle Bulard surflariak ere parte hartuko dute. Argazkian, Garazi Sanchez getxoztarra / cc-by-sa Gorka Palazio.
Mutilen kategorian, Euskal Herriko surflariak oso sasoi onean daudela azpimarratu behar da: Natxo Gonzalez (iazko Billabong Pro Junior-aren laugarren sailkatua), Borja Agote, Alex Gironi, Ander Mendiguren, Txaber Gaminde eta Kosme Fernandez, besteak beste. Frantziar Estatuko surflariak ere faboritoen artean egongo dira, Ian Fontaine (iazko txapelduna) buru dutela, William Aliotti eta Tom Cloarec ahaztu barik. Bestalde, Reunion Irlatik ere Jorgaan Couzinet eta Kieran Bulard izango ditugu, Portugalgo Federico Morais eta egungo liderra den Vasco Ribeirorekin batera. Halaber, Marokotik Ramzi Boukhiam helduko da, egungo laugarren sailkatua eta iazko finalista.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun