Langile eta zerbitzu publikoen aurkako "erasoa" salatzeko asmoz, LAB sindikatu abertzaleak hainbat elkarretaratze burutuko du bihar, osteguna, eguerdi aldera. Uribe Kostari dagokionez, protesta Gorlizko ospitaleko ate nagusiaren aurrean egingo dute goizeko 12:30ean. Aurretik, delegatuen asanblada egingo dute goizeko 10:00etan Gorlizko Teresiano kultur etxean. Zentralak zabaldu duenez, PPk osatutako Espainiako Gobernuak hartu dituen azken neurriak "arlo publikoko langileen aurkako eraso zuzena izateaz gain sektore publiko osoaren kontra doaz eta jendarte guztiari eragiten" diote. Sindikatuaren ustez, "frogatua dago ezarri dituzten neurriek ez dutela ezer konpontzen, alderantziz bide honek hondamendira eramango du euskal jendartea". Horregatik, "orain arte egin bezala", LABek euskal sektore publikoaren "defentsa irmoa egin" eta burujabetza politiko eta ekonomikoa aldarrikatuko du. Argazkian, LABeko kideek ELAkoekin batera, murrizketen salaketa egin zuten atzo PPk Areetan duen egoitzaren aurrean.
Bestalde, LABek beste elkarretaratze batzuk egingo ditu bihar, kasu horretan "euskal aurrezki kutxen suntsiketa salatzeko" asmoz. Izan ere, bihar Kutxabank osatzen duten hiru kutxak batzarrak egitekoak dira. Batzar horietan erabakiko diren estatutu aldaketak "pribatizazioaren bidean aurrera egiteko aukera emango dute" eta "aurrezki kutxen desagerpena ekarriko dute, hau da izaera publikoa galdu eta gizarte ekintza deuseztatuko dute", LABen iritziz. LABek "euskal aurrezki kutxak deuseztatuko dituen eta PSEren laguntza duen EAJ eta PPren arteko ituna" salatu du eta konpromisarioei erreforma horren kontra bozkatzeko eskatu die. Era berean, Cajas-Kutxanbank-en plan estrategiko bat martxan jartzea irmo eskatu du euskal jendartearen zerbitzura egongo den eta Euskal Herriaren alde inbertituko duen euskal sektore finantziario bat eraikitzeko. Bilbon, Kale Nagusiko 19. zenbakian jarri dute hitzordua, BBKren aurrean, arratsaldeko 3:30ean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun