Saio nagusiak irailaren 6an hasiko dira, Mikel Urdangarinen musika intimistaren eskutik. Saio horretan, kantautorea Cristina Pato gaita-jotzaile, pianista eta musikagilearekin ariko da elkarlanean. Ostiralean, Irlandako Kíla taldea igoko da agertokira. Banda hori munduko musiken esparruan nabarmendu da azken urteotan, doinu zelten eta perkusio afrikarren fusioaz baliatuta.
Larunbatean, egun nagusian, Cheikh Lô artista senegaldarraren txanda izango da, zeinen musika ekialdeko eta erdiko Afrikako doinu tradizionaletan oinarritzen baita. Azkenik, igandean, hilak 9, "Sortuko dira besteak" ikuskizuna izango da. Xabier Leteren omenaldi horretan hainbat genero eta estilotako artistak jardungo dira: Pier Paul Berzaitz, Petti eta Mikel Urdangarin kantautoreak; Arantxa Irazusta mezzosopranoa; Eñaut Elorrieta (Ken Zazpi) eta Alex Sardui (Gatibu) musikariak eta Amets Arzallus Bertsolaria.
Arratsaldeko saioetan, zaleek honako talde hauetaz gozatzeko aukera izango dute: Aba Taano ahots-talde ugandarra, Ganbara euskal taldea, Aragoiko Olga y los Ministriles, Gaztela eta Leongo Mayalde eta Toledoko Milo Ke Mandarini. Azken hori INJUVE Musika Zirkuitoak ekimenean parte hartzeko hautatu dute. Bestalde, Munduko Terrazan Ermuako 2011ko Folkez Blai jaialdiaren lehiaketan garaile atera zen Streetwings talde madrildarra eta Granadako Maui y los Sirénidos banda ariko dira. Jaialdiaren musika eskaintza borobildu da Mustapha Agharban musikari marokoarren haurrentzako perkusio-tailerraz, Suyana talde boliviarraren saioaz eta Eskoziako, Senegaleko, Galiziako eta Bizkaiko kale-banden desfileez.
Sarrerak
Ohi denez, saio nagusiak ordaintzekoak izango dira eta gainerakoak, doakoak. Sarrerak eta kontzertu guztietarako abonamenduak asteazkenean, abuztuak 1, jarriko dira salgai BBKren orotarako kutxazainetan, www.bbk.es webgunean, Algortako Kultur Etxean (Villamonte, A-8) eta 944 310 310 eta 94 491 40 80 telefono zenbakien bitartez.
Cheikh Lô-ren erritmo afrikarrak eta Kíla-ren doinu zeltak izango dira Getxo Folk jaialdiko protagonistak
Irailaren 5etik 9ra izango den Getxoko 28. Nazioarteko Folk Jaialdiak bere egitaraua osatu du dagoeneko. Cheikh Lô musikari senegaldarra eta Kíla talde irlandarra izango dira protagonista saio nagusietan. Horietan, Mikel Urdangarin kantautorearen eta Cristina Pato gaita-jotzailearen saioa eta "Sortuko dira besteak" Xabier Leteren kantautore eta poetaren omenezko kontzertua nabarmendu ere behar dira. Guztira, 12 saio izango dira jaialdian zehar. Areetako Xake plazan kontzertu nagusiak izango dira 21:00etan (igandean, 20:00etan) eta arratsaldeko saioak, plazaren ondoko aparkalekuan, 19:00etan (igandean, 18:00etan). Bertan ere Munduko Terrazako kontzertuak (23:00etan) zein goizeko saioak (12:30ean) izango dira. Horiez gain, jarduera anitz egongo dira, esaterako Gobernuz Kanpoko Erakunderen eta elkarteren postuak bilduko dituen Gune Solidarioa, Munduko Eskulanen Azoka, hainbat herritako platerak eskaintzen dituen Munduko Terraza eta kale banden desfileak. Argazkian, Cheikh Lô musikari senegaldarra / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun