Txupinazoaren atarian dira Astrabuduako jaiak

Astrabuduako kaleak jaietako aurreko giroan murgilduta daude jada. Eszenatokiak eta txosnak muntatu, kamioiak herriko tabernei edariak banatu, zapiak hainbat lekutan saldu, herriko kaleetan banderatxoak jarri... Horiek izan dira gaur zein aurreko egunetako lanak. Ekitaldiak gora eta behera, asteazken honetan, abuztuak 8, emango diete hasiera Astrabuduako festei. Koadrilek Axpurutik Josu Murueta plazara arteko jaitsiera egin ostean, 20:30etan, Etorri Galdorri iazko koadrila irabazleak izango du pregoia irakurri eta txupinazoa botatzeko ardura. Hala ere, goizez, Ulpianori omenaldia egin eta txikien txupinazoa botako dute Inazio Aldekoa ikastetxean. Horrenbestez, igandera arte luzatuko dira San Lorentzoak. Argazkia: © Erandioko Udala.