Bestalde, irailaren 3an, oinezkoentzako ibilbide berri bat irekiko du EHUk, atletismo-pistan kokatuta dagoen behin-behineko aparkalekutik kiroldegia eta campuseko eremua lotzen dituen zubira heltzeko. Atletismo-pistaren eta ikastetxeen artean dagoen errepidetik ibilgailu kopuru handia ibiltzen denez, toki batetik bestera arriskurik gabe eta zuzenean igarotzea ahalbidetuko du oinezkoentzako ibilbide berri horrek.
Carmelo Garitaonandia EHU Bizkaiko Campuseko errektoreordeak ibilbide berri hori erabiltzeak duen garrantzia azpimarratu du, bere esanetan, "campusaren sarrera nagusiko biribilgunea oinez zeharkatzea debekatuta egoteaz gain, hori egiten dutenek arriskuan jarriko dutelako beraien buruz, eta hori erabat saihetsi daiteke oinezkoentzako ibilbidea de zubia erabilita".
Medikuntza eta Odontologia Fakultatearen aurrean burutzen ari diren aparkaleku berriaren obrak direla eta ireki da atletismo-pistako behin-behineko aparkalekua. Lanok uztailaren bukaeran hasi ziren eta 2013ko irailerako bukatuta egongo dira. Aparkaleku berri horretan 1.200 ibilgailurentzako tokia egongo da, eta baita autobusentzako 20 nasa eta autobusei itxaroteko eremu estali bat ere.
Gauzak horrela, oinezko ibilbide berrirako eta Parke Zientifikorako lanen eraginez urtearen bukaerara arte bi sarrera izango ditu unibertsitateak: bata, gaur egungo sarrera nagusia (Medikuntza eta Odontologia Fakultatearen ondoan) eta, bestea, Irakasleen Unibertsitate Eskolaren eta Arte Ederren Fakultatearen bitartean dagoen albotiko sarrera.
Carmelo Garitaonandia EHU Bizkaiko Campuseko errektoreordeak adierazi duenez, "ez daukat zalantzarik lan hauek eragozpenak eragingo dituela unibertsitate-erkidegoan, baina ahalegin osagarri bat egin behar dugu guztiok, Parke Zientifikoaren urbanizazioan eta bere saihesbidearen eraikuntzan beharrezko aurrerapausoa delako honakoa".
Herri lanak direla kausa, bihar, astelehena, Bi-647 errepidea trafikorako itxiko dute, Leioatik Unbera doan eta Leioa eta Erandioko campusetik igarotzen duena, alegia. Bizkaiko Foru Aldundiak Europa Press albiste-agentziari jakinarazi dionez, mozketa gauez egingo dute, astelehena eta asteartea bitartean. Lanak direla eta, errail bakarra itxiko dute trafikorako, Unberantza doana. Horretarako, campuseko pasabidearen altueran kontrola ezarri eta beste errailetik bi noranzkoetako trafikoa bideratuko dute, elkarren txandan. Lan horiek unibertsitate inguruan pasa den ostegunean abiatu zirenekin bat egingo dute. Izan ere EHUk Parke Zientifikoan burutzen dabilen urbanizazio lanen eraginez, Leioa eta Unbe arteko errepidea desbideratu egin zuten egun horretatik aurrera eta, ondorioz, campuseko sarreretako bat, Irakasleen Unibertsitate Eskolaren aurrean dagoena, behin-behinean itxi zuten. Argazkian, aurreko lan batzuk campusean, artxiboko irudian
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun