Gorka Garcia Sertutxa "Patas" preso politiko algortarra, Ana Paz haren bikotekide ohia eta Iñaki Goioaga abokatuaren aurkako epaiketa hasi da Madrilen, Espainiako Auzitegi Nazionalean. 2009an atxilotu zituzten, ustez bi urte lehenago Huelvako espetxetik ihesaldi bat prestatzea egotzita. Garcia Sertutxa presoen kaiolatxotik atera dute deklaratzeko, han ez zuelako ezer entzuten, Berria.info agerkariak zabaldu duenez. Huelvako espetxetik ihes egiten ez zela saiatu esan du. Urte gutxi gelditzen zaizkiola zigorra betetzeko, eta laster ateratzea espero duela. Hasieran esan zuten Arkaitz Goikoetxea Basabe getxoztarra zela plana pentsatu eta prestatu zuena —2007an ez zegoen preso— baina Grande Marlaskak auzitik kanpo utzi zuen inkomunikaziotik atera orduko. Hala ere, Arkaitz Valdemoro espetxean daukate, Villenatik (Alacant) bertara eramanda, epaiketan lekuko gisa deklaratzeko. Argazkian, 2009ko ekaineko operazioan Inge Urrutia emakume gaztea atxilotu zuten Algortan eta libre utzi zuten handik egun batzuetara, kargurik gabe
Ana Pazek ere deklaratu du, eta esan du preso algortarrak ez ziola eman inoiz Goioagarentzako "ohar ezkuturik". Guardia Zibilak atxilotu zuenean torturatu egin zutela esan du, antsietatea izan zuela, eta derrigortu egin zutela ohar hori garraiatu zuela esatera. Goioagak abokatuen tokian eserita deklaratu du Jone Goizelaiaren galderei erantzunez. Esan du berak ez diola ETAren partez agindurik eman inoiz euskal presoei. Patasen abokatua dela eta haren defentsan aritu dela, baina ihesaldiei buruz ez dutela inoiz hitz egin. Atxilotu zutenean bere eskubidean urratu zirela ere salatu du. Galdeketek egin zizkiotela abokaturik gabe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun