Gonzalezek uko egin dio deklaratzeari, baina inkomunikatuta egon den bi egunetan jasotako tratua "zuzena" izan dela adierazi du. Halere, senitartekoak atxilotzearekin mehatxu egin diotela salatu du.
Era berean, Imanol Gonzalezen atxiloketa politikoa izan dela salatu zuten ezker abertzaleko gazteek, asteartean bertan Gasteizen eskainitako prentsaurrekoan. Atxiloketa gazteria gelditzeko helburuarekin egindako erasoa izan dela azpimarratu zuten, "heltzear den gazte ekimena indargabetzeko helburua duena". Gazteek jakinarazi dute hilabeteak daramatzatela hausnarketan eta eztabaidan, “herri honetako gazteriari eskaintza politiko bat egiteko”. Gonzalezek ere lan horretan parte hartzen zuela jakinarazi zuten.
Ezker abertzaleko gazteek egindako agerraldiaren bideoa (cc-by-sa Ezkerabertzalea.info)
Ertzaintzak asteartean atxilotutako Imanol Gonzalez Pardo 24 urteko gazte karrantzarra eta Soziologia ikaslea askatzeko eskatu zuten atzo Leioa eta Erandioko campusean 150 bat pertsonak, Topatu.info-k zabaldu duenez. Balmasedan ere, 300 bat lagun mobilizatu ziren atzo, herenegun Karrantzan egindako manifestazioari segida ematen. Baina, babes franko jaso arren, eta bi egun inkomunikaturik egon ostean, Imanol Gonzalez gaur goizean pasa da Espainiako Auzitegi Nazionaleko Pablo Ruz epailearen aurretik. Martxoaren 29ko greba egunean autobus baten azpian etxean egindako lehergailu bat jartzea leporatuta, espetxera bidali du. ”Kalte terroristak” eragitea eta lehergaiak edukitzea leporatu dio epaileak. Fiskaltzak “erakunde terroristako” kide izatea ere egotzi dio, baina epaileak ez du aintzat hartu eskaera. Argazkian, atzoko mobilizazioa campusean / cc-by-nc Topatu.info.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun