Sopelan herri-lasterketa goizeko 11:00etan hasiko da Udaletxe plazan, eta adinaren arabera kategoria ezberdinak banatuko dira: 0-6 urte (200 metro), 7-11 (500 metro), 12-17 (1000 metro) eta 18 urtetik gora (4500 metro). Izena bihar bertan eman ahal izango da. Haurrei dagokienez, "euskaraz bizi nahi dut" kamiseta eskuratu nahi baldin badute, zazpi euro ordaindu beharko dute eta kamisetarik gabe, ostera, euro bi. Helduen kasuan ere aukera bi egongo dira: kamiseta eskuratu nahi izatekotan hamar euro ordaindu beharko dituzte eta bost euro berriz, kamisetarik hartzen ez baldin badute.
Kontseiluak adierazi duenez, "garai berri hau euskararen garaia izango dela bermatu behar dugu denon artean. Orain herritarron aukera da, milaka herritarrek euskaraz bizitzeko erabaki sendoa erakusten badugu, euskaraz bizitzeko baldintzak lortuko ditugu, eta berandu baino lehen euskaraz biziko gara, herri hau euskaraz biziko da. Ez da ametsa, gure nahia baizik!".
Bihar, larunbatarekin "Euskaraz bizi nahi dut!" lelopeko herri-lasterketa hartuko du Sopelak. Dagoeneko Euskal Herriko beste 70 herri baino gehiagotan ekimen bera egingo dutela baieztatu du Kontseiluak. Ekimen horren helburua euskaraz bizitzeko nahia argi eta garbi adieraztea da. Beraz, Sopelan euskaraz bizitzeko duten nahia aldi berean eta modu berean (lasterka) aldarrikatuko dute auzotarrek, Euskal Herriko beste hainbat txokotan milaka herritarrek egin bezala. "Izan ere, guztiok norabide berean boga eginez lortuko da euskaraz bizitzeko nahia errealitate bihurtzea!", antolatzaileak diren Kontseilua, Sopelako Udala, Euskara Zerbitzua eta Aitxu! euskara taldeak adierazi dutenez. Argazkian, Aitxu!-ko hainbat kide iazko Korrikan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun