Patxi Sainz zuzendariaren esanetan, "ikastetxeak betikoa izaten jarraitzen du, baina eraikinak dimentsio berri baten jartzen gaitu: zentro bezala hazi nahi dugu eta gure eskaintza eta ikerketak irakaskuntza teknikoen lehen lerroan jarri nahi dugu. Azpiegitura berri honetara egokitzeko denbora bat beharko dugu, baina nabarmenak izango dira laster toki berri honen abantailak". Bere aldetik, Itziar Aranguiz MHLITUEko zuzendariak adierazi duenez, "eraikin berri honek, polo teknologikoa osatzen dugun zentroetako bai ikasle zein irakasleen artean lankidetza sustatzeaz gain, ikuspena emango digu zentro bezala eta, hemendik aurrera, ingeniaritzetaz hitz egiten denean gutaz ere hitz egingo da".
43.418 metro koadroko azalera
Eraikina César Azkaratek diseinatu du eta 43.418 metro koadroko azalera dauka, beheko solairua gehi bederatzi pisu eta soto bitan banatuta. Horietatik 28.084 metro koadro IITUEri dagozkio eta 13.563 metro koadro MHLITUEri. Guztira, eraikinak 56 ikasgela, 27 mintegi, 7 ikasketa-gela, 238 bulego irakasleentzat, 9 bilera-gela, irakaskuntzako 45 laborategi, ikerketako 26 laborategi, eta baita zuzendaritzarako, administraziorako eta zerbitzuetarako espazioak ere (areto nagusiak, batzar gelak, gradu gela, ikasleen elkarteentzako lokalak, teknikarientzako bulegoak, eta abar).
Kanpoko fatxadari dagokionez, egoitza berriak arkitekturaren, eraikinaren bolumetria eskultorikoaren eta Eduardo Chillidak sortutako UPV/EHUko logotipoaren plastikaren arteko elkarrizketa osatzen du. Kanpoko azalak, urre-koloreko xafla zulatuak, unibertsitatearen logotipoa integratzen du eta batasuna ematen dio eraikin osoari, bere neurri eta eskala handiak ezkutatuz (beheko aldea gehi 9 solairu ditu eraikinak).
Eraikinaren diseinuan jasangarritasunaren aldeko hainbat neurri ezarri dira. Hain zuzen ere, euri urei probetxua ateratzeko sistema, eguzki panel termikoak, argiztapen irizpide jasangarriak eta tenperatura txikiko galdarak jarri dira. Guzti horrekin, urtero 900.000 kg. CO2 isurtzea saihestuko da eta, gutxi gora behera, energiaren kontsumoan 201.000 euro aurreztea suposatuko du.
Carmelo Garitaonandia EHUko Bizkaiko Campuseko errektoreordearen iritziz, "eraikin berri hau martxan jartzearekin agintaldi honetako ardatz estrategikoetako bat bete dugu: gure unibertsitatearen polo teknologikoa sendotzea. Eremu berri honen kohesioak, ezagutzaren arlo honetan, bai irakaskuntzan zein ikerkuntzan ere, sinergia berriak ezartzea ahalbideratuko du. Hortaz gain, arkitektura lan honek UPV/EHUk Bilbon duen presentzia ere sendotu egiten du".
41,4 milioi euro
Eraikinaren kostua 41,4 milioi eurokoa da eta UPV/EHUk eta Bizkaiko Foru Aldundiak finantzatzen dute, Industria Ingeniaritza Teknikoko eta Meatzeen eta Herri Lanen Ingeniaritza Teknikoko eskolen eraikina eta Leioa-Erandio eremuko Irakasleen eskolaren eraikina egiteko erakunde biek izenpetutako akordioaren barruan (65 milioi euro guztira). Eusko Jaurlaritzak utzi du antzinako Erakusketa Azokaren lursailaren %9, IITUEren eta MHLITUEren eraikin berria egingo den orubeari dagokiona.
EHUko Industria Ingeniaritza Teknikoko (IITUE) eta Meatzeen eta Herri Lanen Ingeniaritza Teknikoko (MHLITUE) Unibertsitate Eskolek Bilboko Pitxitxi kalean, antzinako Erakusketa Azoka zegoen lurretan (EITBren egoitza eta San Mames berriaren arten), kokatuta dagoen egoitza berrian hasi dute 2012-2013 ikasturtea astelehen honetan, irailak 24. EHUren azpiegiturak modernizatu eta kalitatezko hezkuntza eta ikerketa garatzeko baldintzak bermatuko dituen egoitza berri honek, Etxetxua plazako (IITUEren kasuan) eta Beurko muinoa kaleko (MHLITUE) egoitzak ordezkatuko ditu. Ingeniaritza teknikoen eraikin berri honen egitasmoa EHUko Campusak Garatzeko Plana (2005-2010) dokumentuan kokatzen da, unibertsitateko iturrien arabera. Egitasmo honen helburuak dira, besteak beste, unibertsitateak Bilbon daukan presentzia berrantolatzea gaikako kontzentrazioari lotutako irizpideei jarraiki, eta gaur egun sakabanatuta dauden ikastegiak hiru polo handiren inguruan biltzea: polo teknologikoa San Mamesen, polo sanitarioa Basurtuko Ospitalaren inguruan eta polo ekonomiko-juridikoa Sarriko-Zorrozaurren. Argazkian, eraikina barrutik / © EHU.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun