Gaur 17:00etan hasiko den udal batzarrerako bi mozio aurkeztu ditu Getxoko Bilduk. Batean, biharko, euskal sindikatuek eta zenbait eragile sozialek deituriko greba orokorrarekin bat egiteko eskatuko diote Udalari. Bestean, publizitatea kontratatzeko orduan, tokiko erakundeak irizpideak zehaztu eta bertako komunikabideak erabil ditzan proposatuko dute. Greba orokorrari dagokionez, Getxo udalerrian 4.504 langabetu daudela gogoratu du koalizio independentistak, hau da, "getxoztarren %5,6ri ukatzen zaio lan egiteko eskubidea, eta horrekin batera bizitza normalizatu bat egiteko aukera". Halaber, Getxoko Bilduk dioenez, 2011n 161 establezimenduk beren ateak itxi zituzten. "Horren aurrean, Udalak, herritarrengandik hurbilen dagoen erakundeak, langile, dendari, ostalari eta, bereziki, prekarietate edo bazterketa-egoeran daudenen eskubideen aldeko bozgorailu izan beharko luke", koalizioaren ustez, greba orokorrari babesa emanez. Argazkian, martxoaren 29ko greba orokor egunean, 500 lagun inguruk egin zuten manifestazioa arratsaldez Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun