Telletxe plazan gosaldu ostean, Algortako kaleetan barrena abiatu dira 40 bat lagun gaurko greba orokor egunean. Banketxeak eta supermerkatuak ixtea zeukaten helburua, saltoki txikiak alde batera utziz. Hala ere, herri erdialdeko denda eta taberna ugari zarratuta zeuden oraindik goizeko 11etan (Orduan abiatu dira grebalariak Bilboko manifestaziora bidea, autoz edo bizikletaz). Algorta behealdean, ordea, saltoki gehienak zabalik zeuden. Horrenbestez, banan-banan sartu dira pikete informatiboko bizpahiru lagun irekita zeuden banketxe eta supermerkatuetara, greba orokorrarekin bat egitera gonbidatuz. Batzuk pertsiana jaitsi dute (une batez). Beste batzuk, ordea, "ezin zutela" esan eta zabalik jarraitu dute. Orduan piketeko kide guztiak sartu dira txilibituak joz eta "Gaur greba orokorra!" oihuen artean. Uneoro Ertzaintzaren patruila eta Patrol bana izan dituzte atzetik grebalariek, baina ez da gorabehera nabarmenik izan. Argazkian, piketea eta ertzainak Torreneko Erkoreka supermerkatu alboan.
Gertaerarik aipatzearren, grebalariak Torrene kaleko Erkoreka supermerkatuan zeudela bezeroetako batek iseka eta irainka hasi zaie. Azalpenak eskatzerakoan gerturatu da haren senarra eta orduan jaitsi dira patruila autotik pare bat ertzain. Hala ere, afera ez da gehiagora heldu. Datuak datu, Urgull kaleko Gizarte Zerbitzuen udal bulegoa zabalik zegoen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun