Leioako Artea merkataritza guneko dendariek ateak itxi dituzte gaurko greba deialdiaren harira, ordu batez bada ere, baina ez dute bat egin murrizketa sozialen aurkako aldarriarekin. Beraien aldetik, guardiek bi erretentzio saiakera indarrez protagonizatu dituzte, baina piketeek eragotzi diete ertzainei bi gazte entregatzea. 16:45 aldera, Itzubaltzeta / Romotik igotako hainbat herrietako 65 bat piketeak somatzean, histeriaz erreakzionatu dute Arteako dendari autonomoek zein soldatapekoek. "Atera! Gerra!" oihukatu dio arropa denda bateko poxpolin batek beste bati, bandera komunistak azalera handian sartu bezain laster. Erantzun gisa, beste beharginak dendako argi guztiak amatatu, arrapaladan irten eta pertsiana automatikoa itxi du, dozena erdi bat segundotan. Inguruko dendetan antzeko erreakzioak ikusi dira, nahiz eta baten batek denbora gehiago eman duen denda ixten, urri ikusi diren bezeroren bat zuen eta. Gauzak horrela, Eroski supermerkatuan sartu da pikete informatiboa eta beharginei jasandako murrizketa sozialen eta grebarekin bat egiteko beharraren berri eman ostean, gurdiak kargatu eta kutxetara zuzendu dira.
Hor eztabaidak izan dira guardia eta grebalari batzuen artean, besteek elkarretaratzea burutu duten bitartean. Giro epel hori apurtu dute guardia batzuek gazte bat erretenitzen saiatu direnean. Gaztea ihes egiten saiatu da, baina parkingean harrapatu, lurrera bota eta estu jagon dute Prosegur enpresako beharginek, Ertzaintzaren zain. Haiengana grebalari mordo hurbildu eta bultzakada batzuen ostean gaztea askatu dute. Borren unea heldu denean, Ertzaintza ailegatu eta lasaitasunaren legea ezarri du. Piketeak Eroski, denda gunea eta Forum zeharkatu ditu, baita bertan futbolean aritu ere. Azken eraikin horren langileek pertsiana jaitsi dute bisitaren ostean, segurtasunekoek gazte bati zapatila batzuk lapurtzen saiatzea egotzi eta harrapatzen saiatu diren bitartean. Gazteak ihes egin du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun