Ana Helguera (EAJ) Ogasun arloko zinegotziak adierazi zuenez, “Madrileko Gobernuaren murrizketak direla eta langileek galduko dutenarekin bat etortzeko beren soldatatik ordainsari bat murrizteko proposamen hori uztailean Gobernu Taldeak bereganatu zuen konpromiso publikotik sortu da. Udal langileekin ez ezik aipatu neurriak pairatzen dituzten Getxoko bizilagunekin ere elkartasuna adierazteko proposatu dugu”. Helguerak aipatu zuen Getxoko Udalaren egoera ekonomikoa "oso bestelakoa" dela Estatuko beste udalerri batzuen aldean; "izan ere, urte askoan Espainiakoaren aurkakoak diren politikak egin baitira hemen".
“Uste dugu ez dela bidezkoa egoera desberdinentzat neurri berdinak ezartzea, ez eta herritarrak izan daitezela eurek eragin ez duten krisiaren eraginak ordaindu behar dutenak”, aipatu zuen Ogasun zinegotziak. Gobernu Taldea "kezkatuta" dago Getxon eta EAEn murrizketa neurriek ekonomian eta gizartean izan dezaketen eraginarekin, “kontsumoan eragin txarra izan dezaketelako eta, hortaz, merkataritzaren, ostalaritzaren eta industriaren egoeran”. Helguerak adierazi zuenez, "Gobernu Taldea lanean ari da Langileen Batzordearekin abenduko aparteko ordainsaria kenduta Udaleko beharginek pairatuko duten erosteko ahalmenaren galera arintzeko neurriak aztertuz".
Getxoko Udalbatzak ontzat eman zuen asteartean zinegotzien eta beraien aholkularien soldatak murrizteko erabakiari. Murrizketa horri esker Udalak 115.000 euro aurreztuko ditu, gutxi gorabehera, tokiko agintarien arabera. Bilduk aurka bozkatu zuen, besteak beste, argudiatuta “soldata murrizketak ez dituela familien egoera hobetzen eta dekretuak bidegabekoa dela ematen badu ezin dugulako Madrileko sukurtsal bat bezala jokatu..." "Ahalegina aholkulari eta liberatu postuak murrizten egin behar dugu”, gaineratu zuten independentistek. Gainontzeko alderdiek proposamenaren alde bozkatu zuten, Madriletik ezarritako murrizketen eragilea nor den eztabaidaren harira PSE-EEk eta PPk elkarri kritikak egin eta gero. Bilduk atzoko greba orokorrarekin bat egiteko proposamenari dagokionez, kontra egin zuten gainontzeko alderdiek. Argazkian, zinegotzi getxoztar guztiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun