2005ean hasitako eginbide batzuen azken emaitza da orain epaiketa hau hastea. EHUko iturriek zehaztu dutenez, eginbide horietan, 500 espediente akademiko baino gehiago aztertu dira, 2007ko maiatzetik 2012ko maiatzerako tartean, 36 pertsonak deklaratu dute (administrazio eta zerbitzuetako langileak, irakasle-ikertzaileak eta kargu akademikoak, hala errektore, nola dekano edo dekanorde), prebarikazioagatik eta dokumentu-faltsutzeagatik inputaturik, eta beste hemezortzik deklaratu dute lekuko gisa. Guztira 5000 orri dituen espedientea osatu da ondorioz.
EHUk, erakunde gisa, behin eta berriro bidali ditu hainbat txosten, eta horietan azaldu ditu, besteak beste, matrikulazio-prozesua arautzen duen indarreko arautegia, ikasleen ebaluazio-sistema, aktak sinatzeko eta aktetan aldaketak islatzeko prozedura, eta ikasleen eskubideak hainbat deialdi erabiltzeari dagokionez.
EHUren babesa
"Aurkezturiko txostenak eta dokumentuak ikusirik, espediente bakar batean ere ez da aurkitu legez kontrako ezer, ez matrikula-prozeduran, ez ebaluazio-prozesuan. Ebaluazioan edo akta-sinaduran erantzukizuna zuten pertsonen aurkako akusazio guztiak artxibatu dira, pertsona deportatuen kasuetakoak barne", unibertsitateko agintariek nabarmendu dutenez. "Irakasle horiek, bestalde, ez dute inolako erantzukizunik izan bi ikasle deportatuen matrikula- eta ebaluazio prozesuetan", gaineratu dutenez. EHUko arduradunen hitzetan, "Enrique Antolinek eta Xabier Aierdik, beren karguei zegozkien eginbideak bete zituzten ikasle berezien taldearekin, eta, marko instituzionalaren barruan, talde horretako ikasleei eskubidez zegokien goi mailako hezkuntzako zerbitzu publikoa bermatzen lagundu zuten". Era berean, Gobernu Kontseiluak espero du "prozedura judizialak ez duela zalantza izpirik utziko irakasle hauen jardunbideari buruz, eta argi erakutsiko duela lan egokia egin dutela erakunde honetan".
Getxoko lehen auzialdiko eta instrukzioko epaitegiak, fiskalaren eta akusazio partikularren eskaeraz, irailaren 4an jakinarazi du ahozko epaiketa hasiko duela Jose Enrique Antolin Iria eta Xabier Aierdi Urraza EHUko irakasleen aurka, prebarikazio-delituaren akusaziopean. Ikustaldia Bilboko dagokion Zigor-arloko Epaitegian egingo da eta lan-egiteko edo kargu publiko bat betetzeko 8 urteko inhabilitazioa eskatzen du bakoitzarentzat. Akusazioaren oinarria ondokoa da: 1992/1993 eta 2001/2002 ikasturteetan, bi deportatu politiko matrikulaturik izan ziren EHUn, Egoera Bereziko Ikasleen Sistemaren barruan. Ikasle horiek matrikulaturik izan ziren epealdiaren zati batean, Enrique Antolin Gizarte eta Komunikazio Zientzietako Fakultatearen dekanordea izan zen eta Xabier Aierdi tutorea. Horrenbestez, Cabo Verden zendutako Angel Lete Etxaniz ustezko etakideak Filosofia eta Zientzia Politikoak egin zituen, eta Dominikar Errepublikan zen Belen Gonzalez Peñalvak Zientzia Politikoak. Horrenbestez, EHUko Gobernu Kontseiluak aho batez onartu du, gaurko batzarrean, bi irakasleei sostengu eta elkartasun osoa adieraztea. Besteak beste, aipatu organoak gogoratu duenez, "Konstituzio Auzitegiak berak oraintsu eman du presondegietan dauden pertsonei buruzko EHUren protokoloa onesten duen Sententzia, eta, sententzia horretan espresuki zehazten duenez, 'Unibertsitateari berari dagokio, kanpoko interferentziarik gabe, (...) unibertsitateak eskainiko duen urruneko hezkuntza-zerbitzuaren baldintzak arautzea'". Gaineratu duenez, "protokolo honetan sartzen dira beste zirkunstantzia batzuengatik ere ikasketak aurrez aurreko eskoletan ezin egin dituztenenak". Argazkian, ikasle presoen aldeko mobilizazioa Leioa eta Erandioko campusean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun