Algortako Abian kultur elkarteak gaur, ostirala, inauguratuko du bere egoitza izango den taberna. Elkarteak zabaldu duenez, ekitaldia Telletxe plazatik abiatuko da, arratsaldeko 8:30ean. Handik kalejiran Bidebarri kaleko bigarren atari ondoan dagoen Abian tabernaraino helduko dira inaugurazioan parte hartu nahi izango duten auzokideak. Sustatzaileek gonbidapen zabala egin dute, "guztion artean proiektu berritzaile eta ekintzaile honi ongi etorria eman diezaiogun, animatu, eta etor zaitez!". Taberna zabaltzeko erronka iazko abenduaren 15ean aurkeztu zuen elkarteko talde dinamizatzaileak eta herri batzarrean parte hartu zuten 50 pertsonen gehiengo oso zabalak proiektuari argi berdea ematea adostu zuen. Handik hona, auzolanez eta bazkide-kuotaz jardun dute lokala egokitzeko. Abianek hiru helburu nagusi ditu: abertzale eta ezkertiarren arteko indar metaketarako baldintzak probestea; herriaren eta herritarren aktibazioa bultzatzea; eta proiektu abertzale eta ezkertiarrak herrian erreferentzialtasuna irabaztea. Argazkian, Abiango kide bat kanpoko dekorazioari azken ukituak ematen atzo gauean.
Zabalduko duten lokalean lehen Algortako herriko taberna zegoen Gorrondatxe kultur elkarteak kudeatuta. Herriko tabernak "ETAren diru iturri gisa" erabiltzea egotzita Espainiako Auzitegi Nazionalak zabalik duen 35/02 auzian agertzen da Gorrondatxe, nahiz eta ikerketa zabaldu eta 10 urtetara epaiketarik egin ez izana. Jose Luis Franco eta Maite Amezaga algortarrak, Izaskun Barbarias urduliztarra eta Getxoko Udalean hainbat urtez lan egin duen Sabin del Bado sondikarra dira auziperatuetako batzuk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun