Zabaldutako mezua horrela amaitu zuten: "Sopelan hiru lagun galdu ditugu. Haiekiko sentitzen dugun errespetua adierazi nahi dugu. Irailaren 27 honetan gure hildako lagunak gogoratu nahi ditugu. Haien bizitza herri honen historiaren zati ezkuta ezina baita. Ez ditugu inoiz ahaztuko".
David Alvarez Lemoizko zentral nuklearraren aurka ETAk egindako ekintza batean zauritu zuten eta Basurtuko ospitalean hil zen. Bere senideek "Guardia Zibilaren eskutik jaso zuen jazarpenagatik" hil zela salatu zuten. Mario Alvarez, Daviden anaia, komandoko kideekin zegoela istripua eduki zuen: granada batek eztanda egiterakoan eragin zizkion zauriak oso larriak izan ziren eta bertan hil zen. Iñaki Aurrekoetxe "Sope" erbesteratu egin zen eta Ipar Euskal Herrian gaixorik jarri zen. Gaixotasun horren ondorioz hil zen.
Atzo, irailak 27, Gudari Eguna izanik, hildako hiru sopeloztarrak gogoratzeko kartelak zein oroigarriak ipini zituzten Sopelako kaleetan. Horietan David Alvarez Peña "Dabi", Mario Alvarez Peña eta Iñaki Aurrekoetxea Zubillaga "Sope"-ren inguruko mezua agertzen zen, Sopela.net agerkari digitalak argitu duenez. Zabaldutako mezuan azpimarratu zutenez, "ziklo bat amaitu da eta beste berri bat abian da". Hori esanda, "urte gogor hauetan galdu ditugun lagunak gogoratzeko eta maitatzeko eskubidea aldarrikatzen dugu" aipatu zuten. Aitorpen horrekin batera hurrengo hau ere egin zuten: "Beste aldean dauden hildakoekiko errespetua aldarrikatzen dugu. Elkarrenganako errespetua nagusitu behar da". Argazkia: © Sopela.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun