Itziar Epalza Getxoko Udalaren Turismo zinegotziak nabarmendu duenez, “seigarren urtez egingo du bat Getxok kanpainarekin, Getxoko Kultura-Ondarea herritar guztien artean zabaltzeko,kalitatezko esperientzia baten bitartez, gure ondarea gozatzeaz gainera bere ezagutza eta bere kontserbazioarekiko errespetua ere lortzeko, eta ondarea ingurumenaren zaintzearen aldeko estrategietan (XXI agenda) sartzeko, ondarea ingurumenaren zati bat dela eta geroko belaunaldientzat babestu eta zaindu behar dela iritzita”.
Epalzak gogoratu duenez, “Getxorentzat jardunaldien aurtengo gaia ez bada ere aurrekoetakoa bezain egokia, Udaletik egitaruari eusten ahalegindu gara, aurreko ekitaldietan parte hartu zuten pertsonek inkestetan egindako aldeko balorazioa aintzat hartuta”.
Antzezlana
1520 urtea da. Ez da denbora luzea Bilboko Kontsulatuak, Algortako marinelen mesedetan, eta ez Portugaletekoenean, itsasadarreko barra kontrolatzen duela. Dama getxotar batek zaldun batekin ezkondu beharra du, nahiz eta Algortako marinel bat maite duen ezkutuan. Nabigatzailea ere ez da hutsaren hurrengoa, aitzitik, pilotua da eta bere ustez, hein batean behintzat, merezi du dama. Baina, zer egin dezake pilotu anaikide batek elkartzeko eta aurrera egiteko erabakia hartu duten bi leinuren kontra? Zein indar du maitasunak ezkontza-hitzarmen baten aurka?
Urriaren 5etik 14ra ospatuko dira Getxo udalerrian Ondarearen Europako Jardunaldiak, Udalak antolatuta Turismo Bulegoaren bitartez. Bizkaiko Foru Aldundiaren Ondare Zerbitzuak lurralde historiko osoan sustatutako ekimenarekin bat egingo dute jardunaldi horiek, oraingo honetan “Bizkaia Erdi Aroko udazkenean / 1500. urteko Bizkaia” lelopean. Getxon, jarduera-egitarauak sei antzezpen ibiltari hartuko ditu, “Erresak eta barrak. Ezkontze amodiozko, bizitze dolorezko” antzezlanarenak, hain zuzen ere. Bi asteburutan egingo dituzte antzezpenak. Urriaren 5ean, 6an eta 7an, Simulacro Taldea arduratuko da saioez, Algortako Telletxe plazan (lehen bi jardunaldietan 18:30ean eta hirugarrena 13:00ean). Gainontzeko hiru egunetan, hilaren 12an, 13an eta 14an, muntaia Areetako Xake plazara eramango dute, ordutegi berberarekin. Ez da aldez aurretik erreserbarik egin behar eta sarrera doan da. Argazkian, orain urte batzuk Algortako Portu Zaharrari buruzko bisita antzeztua hartu zuten Ondarearen Europako Jardunaldiek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun