EHU: "Ez da arazorik izango 2012-2013 ikasturteari dagozkion Erasmus diru-laguntzak banatzeko"
Europar Batasunaren aurrekontuko arazoengatik Erasmus programaren bideragarritasuna zalantzan jartzen duten berriak agertu dira azken orduotan. Hori dela eta, adierazpena plazaratu du Euskal Herriko Unibertsitateak. EHUko arduradunen hitzetan, "2012-2013 ikasturtean proiektua normaltasun osoz garatzen ari da, eta lehenengo zein bigarren lau hilabetekorako aski funts dauka". Zabaldutako datuen arabera, ia mila ikasle izango dira 2012-2013 ikasturtean Erasmus programan parte hartzen. Horietako gehienak dagoeneko Europako unibertsitateetan daude ikasten (ikasturte osorako eta lehen lauhilekorako joan direnak), eta gainontzekoak Gabonak eta gero joango dira. Egitasmoan parte hartuko duen ikasle bakoitzari 110 euro ordainduko zaizkio hilero Europar Batasunetik etorritako funtsetatik, EHUk dioenez. Horrez gain, Eusko Jaurlaritzak, Espainiako Hezkuntza Ministerioak eta Kutxabankek emandako diru-laguntzak ere izango dituzte.
"EHUko Nazioarteko Hedakuntza Errektoreordetzak badu dagoeneko 2012-2013 ikasturteko Erasmus programari dagokion kontusaila eta diru horrekin ordainketak egiten ari da. Beraz, ez da arazorik izango 2012-2013 ikasturteari dagozkion Erasmus diru-laguntzak banatzeko", amaitu dute unibertsitateko agintariek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun