Bolueko hezegunea Gobela ibaiko ibarrean dago, ibai horrek eta Larrañazubi errekak bat egiten duten tokian. Azken urteetan, "ahaztuta zuten leku bat izatetik Bizkaiko kostaldeko erreferentziazko hezegunea izatera iritsi da ornitologoentzat".
Keltse Eiguren Getxoko Udalaren Ingurumen Arloko zinegotziak nabarmendu duenez, "berezko dituen ezaugarriei, bere kokapenari, zein bertan egindako gaztetze eta birsortze lanei esker, biodibertsitate interesgarria geratu da bertan. Biodibertsitate horren protagonista nagusienetako bat hegaztiak dira. Horiek bio-adierazle bezala erabiltzen dituzte eta hainbat azterketa lerro eta egitasmoen jomuga dira. Espezie habiagileen, negutarren eta paseko hegaztien segimenduak dira horren adibide, hegaztien eraztunketa zientifikorako estazioan erabiltzen den tresnetako bat delarik”.
Hegaztien presentzia zabala
Hezegunearen hedadura txikia bada ere, bertan interesgarriak diren hainbat espezie ikus daitezke, hala nola, lekari arrunta eta karratxina, uroilanda handi europearra, uroilanda pikart, amiltxori, koartza hauskara eta gorri, martin arrantzalea, papo-urdina, zingira-berdantza eta anatido desberdinak. Oso garrantzitsua da txori txikien komunitatea, oso aberatsa eta askotarikoa.
"Horregatik guztiagatik, Hegaztien Munduko Eguna ospatuko da Bolueko hezegunean, nahi duten guztientzat zabalik egongo den jardunaldian, hegaztien eraztunketa zientifikoa eginez. Bertan, ikerketa-teknika hori erakutsi eta komunitate horren konplexutasuna azalduko zaio jendeari, hegazti espezie asko hurbiletik ikusteko aukera ematearekin batera", zehaztu du Eigurenek.
Etzi, larunbatarekin, Hegaztien Munduko Egunaren harira hegaztiei asmo zientifikoekin eraztunak jartzearen erakustaldia izango da Bolueko hezegunean. Jarduera hori Getxoko Udaleko Ingurumen Arloak antolatu du, Txepetxa eraztunak jartzeko taldearen laguntzarekin. Hegaztien Munduko Eguna mundu osoan egiten den ekitaldia da, BirdLife International erakundeak bultzatuta. 100 herrialde baino gehiagotan ospatzen da, Euskal Herria tartean. Bere helburu nagusia, ahalik eta jende gehienari hegaztien mundua eta beren habitatak hurbiltzea da, zelan bizi diren, zein mehatxuak eta arriskuak dituzten ezagutzera emateko. Eta horrela, bide batez, ingurumena zaintzeko garrantziaz kontzientziatzeko. Erakustaldia goizeko 9etatik 13:00era egingo da hezegunean, eguraldi ona egiten baldin badu. Hau da, euria izan edota haize handia ibiltzekotan, bertan behera geratuko litzateke, tokiko iturriek azaldu dutenez. Argazkian, txori bati eraztuna jartzen Boluen / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun