Halere, Abianetik argi utzi nahi izan zuten espazio berritzaile horrek "aurrera egiteko guztion ekarpenak beharrezkoak" direla. Hori dela eta, elkarteko kide izatera gonbidatu zituzten bertaratutakoak. Dena den, ez zen hori izan laguntzeko eskaini zuten bide bakarra. Ekimenak antolatzeko deia ere luzatu zuten, baita txandaren bat egiteko aukera eman ere.
Abianen inaugurazioa iruditan
Pasa den ostiralean, Algortako Abian kultur elkarteak bere egoitza eta taberna estreinatu zituen, jende andana batu zuela. Azken Ostirala dela eta Telletxe plazan egindako presoen eskubideen aldeko elkarretaratzearen ostean, kalejiran abiatu ziren dozenaka lagun abertzale eta ezkertiarren topagune berrira, Bidebarri kaleko bigarren atari ondora. Bertan, instalazioak goitik behera ikusteaz gain, Gorrondatxe abesbatzak emandako saioaz, lagun giroaz eta jan-edanaz gozatu zuten ehun lagunak baino gehiagok. Besteak beste, honako aurpegi ezagunekin gurutzatu ziren bertara joandakoak: Paul Bilbao Kontseiluko idazkari nagusia, Rozio Luzes Egizu!-ko dinamizatzailea, Lander Solozabal Bizarra Lepoan elkarteko presidentea, Maitane Nerekan Umaran eta Arantza Gutierrez Bilduren zinegotziak edota Fakun Aznarez Askapenako ordezkaria. Horiez gain, Algortako jai batzordea, Algortako Bertsolari Eskola, Bilgune Feminista, Algortako Gazte Asanblada, Eztabaida, Herrira, gazte mugimendua edo Getxo Rugby izan ziren ordezkatuta egon ziren taldeetako batzuk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun