Landak aipatu duenez, “Getxoko turismoarentzat eremu estrategikoa denan kokatuta dago bulego hau, hots, Ereagako hondartzan. Proposamen estetiko modernoa eta erakargarria asmatu dugu bulegoarentzat, ingurunean sartuta dagoena, eta horren ondorioz, gure bisitariei zerbitzurik onena emango diegu”. Diseinu oso zaindua izango du barrualdean eta fatxadan material nobleak erabiliko dira, egurra bezalakoak, Imanol Landa buru duen taldeak bultzaturiko turismo proiektuarekin bat etorriz. Bulegora itsas pasealekutik sartuko da iparraldeko fatxadatik, eta jendearen arretarako gune zabala izango du. Langileentzako hiru bulego, biltokia, atondoa eta komunak izango dira bertan.
Joseba Arregi Hirigintza zinegotziak, bere aldetik, nabarmendu duenez, “jatorrizko eraikina 1966an eraiki zuten eta 1988an zaharberritu zuten, horregatik gaur egun atondu beharra daukagu beharrizan berriei egokitzeko. Egungo eraikinaren diseinuari eutsiko diogu, arkitektura arrazionalistaren ezaugarriak nabarmenduz, eta egungo itxura handiagoa eta itsasoari lotuagoa emanez. Eraikina itsasora zabaltzen da, hondartzako pasealekuko sarbideak saihestuz, klimatologiak gehien zigortutako lekuak baitira”. Eraikin barruan biziberritu nahi den beste eremu bat, patioa da, eraikinari argia eta itzala eman behar dion espazioa dela, eraikineko aireztapen sistemako elementu garrantzitsua eta eraikineko beste espazio bat dela uste baita.
“Arlo turistikoan funtsezko puntua da hau, jende asko dabil paseoan, bai bisitariak, bai turistak bai auzotarrak, Bizkaiko pasealekurik jendetsuenetarikoa da. Eta horregatik bisitarientzako eta turistentzako arreta gunea handiena da, gune irekia, pasealekutik zatozela barruan egiten den guztia ikusiko delarik”, esan du, azkenik, Itziar Epalza Turismo zinegotziak.
Algortako Ereaga hondartzako La Terraza eraikineko lokalen zati batean udal Turismo Bulego berria egokitzeko lanak hasi dira dagoeneko, “itsasoari begira” egongo dena, Imanol Landa Getxoko alkateak gaur eskainitako prentsaurrekoan aditzera eman duenez, proiektua ezagutzera ematerakoan. Lanak 6 hilabetean egingo dituzte eta 550.000 euro zuzenduko dituzte horietara. Eraikineko 642 metro koadroetatik 322tan egingo dituzte lanak. Gogoratu behar da egun eraikinean taberna-jatetxe bat eta komun publikoak (aurten zaharberrituak) daudela. Barrualdea botatzeko lanak egiten ari dira lehenik eta behin, ondoren geotermia bidezko klimatizatze sistema ipini eta gune berriak egokitzeko. Obrak egiteko Bizkaiko Foru Aldundiaren baimena jaso dute jada, etxea babestuta baitago. Ekipamendu horren egokitzeak hondartzako zerbitzuak ere hartzen ditu, hau da, lehen laguntzarako eta hondartza zaintzeko zerbitzuak, hondartzainak eta Babes Zibila eta garbiketa-taldeen aldagelak eta instalazioak. Guztira 140 metro koadro. Horrez gainera, egungo aparkalekua urbanizatuko da (250 metrom koadro). Turismoko egoitza berriak, 2103ko Aste Santuan irekiko ditu ateak, gaur aurreratu dutenez, eta 182 metro koadroko azalera izango du guztira. Argazkian, Epalza, Landa eta Arregi gaurko prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun