"Arazo logistikoak direla eta", EH Bilduk gaurko Algortan iragarrita zeukan kalejira bertan behera gelditu da, koalizioko iturriek jakinarazi dutenez. 19:00etan izan behar zuen, Telletxetik abiatuta; gero 20:00etan Herriraren preso eta iheslarien aldeko elkarretaratzera joateko. Bitartean, Erandion, aurkezpen jaia eta mokadutxoa egingo dituzte 20:00etan, Astrabuduako herriko tabernan. Ordu berean, informazio bulegoa zabalduko dute, Sopelako Elizalde kaleko 1. zenbakian. Larunbatari dagokionez, argazki masiboak aterako ditu EH Bilduk Sopelako Udaletxe plazan eta Algortako Maria Kristina parkean; 12:00etan eta 13:00etan, hurrenez hurren. Gauza bera egingo dute Erandion, igandean, 13:00etan, Astrabuduako Josu Murueta plazan. Algortako argazkirako bakoitzak bere lan-hobby tresna eramatea eskatu dute. Argazkian, 2011ko maiatzaren 11n, Bildu koalizioak udal eta foru hauteskundeetarako mitina eman zuen Algortako Tellagorri plazan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun