Areetako Mesedeetako Amaren kaleko skate pista ixteko edo tokiz aldatzeko exijitu dio gaur Getxoko PSE-EEk Imanol Landa alkate jelkideari, "epaileek ere uste dutelako pertsonentzat arriskutsua eta kaltegarria dela". Bilboko Administrazioarekiko Auzietako 3. Epaitegiak aipatu kirol azpiegiturak sortzen duen zarata murrizteko neurriak hartzea eskatu dio Udalari, irailaren 14an plazaratutako ebazpenaren bidez. Horretan oinarrituta, neurri horiek hartu arte "skate pistaren erabilera eragotzi" beharko lukeela uste du Luis Almansa sozialisten bozeramaileak. Epaiak berak horrela eskatzen du. EAJren Udal Gobernuak, ordea, epaiaren zati horri helegitea aurkeztuko dio eta sententzia irmoa den bitartean ez du pista zarratuko. Udalaren arabera, "auzitegiek abala eman diotela Areetako skate pistaren kokalekuari". Izan ere, eskaririk gogorrena zen ekipamendua lekuz aldatzea neurriz kanpo ikusi du magistratuak. Argazkian, 2009ko maiatzaren 20an Getxoko PSE-EEko zinegotziek eta zenbait auzokidek skate pistan parkea egiteko eskaera aurkeztu zuten prentsaurrean.
Sententziak onartzen du inguruko etxeetako barruetan egindako neurketetan pistaren erabilerak eragindako zarata-mailak legeak baimendutako neurriak betetzen dituela baina halere beharrezkotzat jotzen du eragozpenak murrizteko Getxoko Udalak kalean zarataren maila gutxitzeko neurriak har ditzan. Horren aurrean tokiko erakundeak ingurunean integratuta egongo diren pantailak jarriko dituela iragarri du. PSE-EEren iritziz, baina, "Areetako erdiguneko zonaldeetan inpaktu estetiko handia eragingo duen adabaki narrasa baino ez" dira izango pantailak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun