"Ikasturte berriari hasiera emateko ordua heldu da. Hainbat kontu guztion artean argitu behar ditugu. Hurrengo ikasturtea gorpuzteko unea dugu hau", adierazi dute Berbots Erandion Euskaraz! elkarteko kideek. Horretarako ohiko bilera orokorra egingo dute astearte honetan, urriak 9. Hitzordua 19:00etan izango da Bekoa ikastetxean (Berbotsen lokalean, 2. solairuan). Bertara agertzea "oso garrantzitsu" deritzote, hainbat kontu jorratu behar dituztelako: aurreko ikasturteko balorazioa, hurrengo ikasturteko programazioa, Berbalagun egitasmoa, 2013ko Kanpomartxo, Justuri irratia, euskara elkarteen Topagunearen kongresua eta beste hainbat kontu. Joaterik ez duenak ideiak, proposamenak eta iritziak e-postaz bidaltzerik badauka. Bestalde, denbora daukatenentzat, 18:00etan bertan gelditu dira, bilera hasi aurretik, lokala apur bat atontzeko. Bide batez, hurrengo ekitaldien berri ere eman du Berbotsek: urriaren 20an, larunbata, Etnotoponima txangoa izango dute Erandion; eta hilaren 28an, igandea, Uribe Kostako altxor geologikoa ezagutzeko berbatxangoa. Argazkian, orain bi urte Lutxanan egindako Kanpomartxo jaia.
Urriaren 20an, larunbata, Etnotoponima txangoa izango dute Erandion. Fredi Payak bisita gidatua egingo du Akarlandatik Martiartuko dorrera. Fredi Erandioko baserrietatik ibili zen bertokoei euren istorioak entzuten: aspaldi gertatutako pasadizoak, Erandioko lurretako kontu mitologikoak, tokiko izenen zergatia..., hau da, aitite-amamen istorioak. Autobusez egingo dute: goizeko txangoa izango da, Erandion 10:00etan geldituko dira eta eguerdian herrira itzuli. Urriaren 28an, berriz, Uribe Kostako altxor geologikoa ezagutzera joango dira, Kodo Nuñez Beteluk lagunduta. Autobusez ere egingo dute: 09:00etan atera eta eguerdian buelta. Aipatu bi ekintzetan parte hartzeko aurretik eman beharko da izena, ondoko helbide elektronikoan: berbots[abildua]gmail.com.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun