IFZ enpresa baten identifikazioa da, eta agiria eskuratzea ezinbestekoa da bankuko kontuak irekitzeko, kontratuak egiteko eta, azken batean, enpresak jarduera ekonomikoaren edozein eragiketa egiteko. Beraz, IFZ ezeztatzea eta ezeztapen hori BAOn argitaratzea, foru arduradunen hitzetan, zerga administrazio batek "zerga iruzurraren sareen aurka egiteko har dezakeen neurri gogorrenetako bat da", erakunde horiei trafiko juridikoan eta ekonomikoan jarduteko aukera guztiak kentzen baitizkie, bankuko kontu horietan eragiketak egitea barne, kontuak blokeatu egingo direlako eta ezin izango dutelako zordunketa eta ordainketa gehiagorik jaso. "Mota honetako erakundeek, gainera, Europako Batasunaren barruko eragiketetan parte hartu ohi dute, balio handiko ondasunak erosi edo inportatzeko, Balio Erantsiaren gaineko Zerga (BEZ) edo erosketa horiei ezarri behar zaizkien gainerako zeharkako zergak ordaindu gabe", salatu du Aldundiak.
560 milioi euroko iruzurra
Foru erakundetik adierazi dutenez, "iruzur fiskalaren aurkako borroka etengabeko lana" da Bizkaiko Foru Ogasuneko ikuskarien taldearentzat. IFZ dokumentuen ezeztatzearekin batera, joan den irailean Bizkaiko Aldundiak lurraldean jolas makinen sektorean egindako erregularizazioa jakinarazi zuen. Lan horri esker, 85 enpresa eta 42 pertsona azaleratu dira (guztira, 21 milioi euroko iruzurra). 2011ko ekitaldia bakarrik hartuta, 560 milioi euroko iruzurra atera zuen argitara Bizkaiko Aldundiak, ustezko delituen 16 txosten bidali zituen Fiskaltzara, eta Bizkaiko zergadunen 49 milioi datu baino gehiago trukatu zituen beste zerga-administrazio batzuekin.
Leioako enpresa bati IFZ ezeztatu dio Aldundiak, iruzur fiskala eta irregulartasunak egitea egotzita
Bizkaiko Foru Aldundiko Ogasun eta Finantzen Sailak hamar enpresari ezeztatu die Identifikazio Fiskaleko Zenbakia (IFZ), iruzur fiskalari aurre egiteko neurri hori ekainean abian jarri zuenetik. Hain zuzen ere, horien artean da Leioako Sabino Arana Etorbideko 22. zenbakian egoitza duen Logistica Alquiler Vicahisa. Horiei guztiei "iruzur fiskala eta beste irregulartasun mota batzuk egitea, hala nola enpresa leku ezezagunean egotea edo enpresa eratu denetik epe luzean inolako jarduerarik egin ez izana" leporatzen die foru erakundeak. Bizkaiko Aldizkari Ofizialean (BAO) argitaratu da jada dokumentuaren ezeztapena. Izan ere, BAOn argitaratzea ezinbesteko izapidea da eragile juridiko eta ekonomiko guztiek jakin dezaten enpresa horrek ez duela baimenik inolako eragiketarik egiteko, Aldundiko iturriek zehaztu dutenez. "Ekimen hori abian jartzea Bizkaiko Ogasun eta Finantzen Sailak iruzurraren kontra abiarazitako azken neurri berrienetako bat da. Horren bidez, iruzurra egiten duten enpresen aurka egin nahi da, baita zergak ordaintzea saihesteko pantaila edo bitarteko dabiltzan enpresen aurka ere", gaineratu dute. Argazkian, Jose Luis Bilbao ahaldun nagusia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun