Erandion zabaldu zuten moduan, Gazte ZukGua prozesu eratzailearen barruan hainbat lan aurreratu dute gazteek dagoeneko. izan ere, "amesten dugun etorkizuneko Euskal Herriaren" zirriborroa adostu dute. "Askea eta sozialista, independente eta feminista, eta berde eta internazionalista" izan behar du, haien ustez, "azken finean, Euskal Herri iraultzailea, Euskal Herri ezberdina".
Bide horretan, harro agertu dira "ezberdintasun hori jadanik lantzen hasiak" direlako eta "harreman dinamikaren bitartez" haien berri izan dutelako gazteek. "Kaleak astindu ditugu harreman naturalak garatuz", gaineratu dute.
Baina, udan ere egindako lana izan zuten aipagai: "nork ez ditu ikusi Itzubaltzeta / Romon izar polemikoak? Eta Leioan fruta iraultzaileak? Ikusi denez, ez dugu uda bulego ilunetan pasata, kanpora begirako lanari ere garrantzi handia eman diogu", azaldu dutenez.
Baina orain, Euskal Herriko egoera orokorra, ziklo politikoa eta gazte estrategia daukate mahai gainean herrietako gazteek, "norbanakotik kolektibora" joan nahi duen prozesu dinamikoan. Eztabaidetan gazte orori egin diote parte hartzeko gonbitea.
Pasa den astean, hainbat herritan ezker abertzaleko gazte antolakunde berri bat sortzea helburu izango duen Gazte Zukgua prozesu eratzailea aurkezteko hainbat saio izan ziren eskualdean. Bildutako gazteriak ekimena ospatzeko aukera ere izan zuen Erandioko Kalezulon gaztetxean, bertako jaialdian 100 gazte baino gehiagok parte hartu zuela. Baina "gazteok antolatzeko eta borrokatzeko dugun joera naturalak" bideratuko duen esparruaren hutsunea betetzeko lanak gaur, Hispanitatearen Eguna omen dena, heldu dira herrietara. Gauzak, horrela, goiztiarrenak erandioztarrak izan dira, lehenengo batzarra "jai egun arrotzei aurre eginez" burutu dutela harro azaldu dutenak. Erandioz landa, gazte antolakunde berria sortzeko hausnarketa eta eztabaida prozesua hartu dute ere algortarrek San Nikolas ikastolan arratsaldeko 4etan eta Mankomunitateko gazteak Plentzian batu dira, 17:00etan. Itzubaltzeta / Romon, ordea, 18:00etan ekingo diote lanari, herriko eliz atarian. Prozesua garatzen azkenak leioaztarrak izango dira, gaur zortzi bilduko direnak, Sakoneta kiroldegian, 19:30ean. Argazkian, pasa den larunbatean Kalezulon egindako ekitaldiaren irudi bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun