Bigarren Kongresuan mugimenduaren antolakuntza, finantzazioa eta jardunarekin lotutako eraldabideak (jarduera eraldatzeko proposamenak) aurkeztu ditu Federazioaren Zuzendaritza Batzordeak, eztabaidarako. Gogoeta prozesu parte hartzailea antolatu da bigarren Kongresurako, aurkeztutako eraldabide proposamenen arteko aukera Federazioko kide guztien parte hartzearekin egin nahi baita. Euskal Herrian zehar kokatuta dauden euskara elkarte guztiei aurkezpenak egin zaizkie lehen fase batean eta jadanik dokumentuen azterketan barneratuta daude elkarteetako ordezkariak, hurrengo asteotan eztabaidagai izango dituzten proposamenak aztertzen.
Azaroaren 17a hautatu da Kongresuari amaiera eman, eraldabideak onartu eta praktikan jartzen hasteko egun modura. Bilboko Euskalduna Jauregian egingo den biltzarrean mugimenduarentzat gogoeta sakonerako aukera eman duten bi urte eta erdiko prozesu sakonari bukaera emango zaio. Mugimenduko kide guztiei bertan parte hartzeko gonbidapena egin die Federazioko Zuzendaritza Batzordeak.
96 elkarte
Topagunea Euskara Elkarteen Federazioa 1997an sortu zen, eta Araba, Bizkaia, Gipuzkoa eta Nafarroako 96 euskara elkartek osatzen dute. Elkarteon zein Federazioaren beraren helburua euskaldunon hizkuntza komunitatea indartzea da, euskararen erabilera sustatuz eta motibazioan eraginez. Horretarako, hainbat esparru lantzen dituzte, hala nola haur eta gazteen aisialdia, kulturgintza, tokiko hedabideak, mintzapraktika, entitateak euskalduntzea eta sentiberatzea.
Bilboko Euskalduna Jauregian egingo du azaroaren 17an Topagunea Euskara Elkarteen Federazioak bigarren Kongresua, Mugimenduaren hurrengo urteotako eraldabideak onartuko dituen Kongresua. “Federaziotik Mugimendura” izena jarri dio gogoetari Topaguneak, hurrengo urteetarako euskaldunon gizarte mugimendu indartsua antolatzea baitu xede modura. Azaroko saioarekin amaiera emango dio Topaguneak 2011 urteko Kongresuan abiatutako gogoetari. Iazkoan euskara elkarteen mugimenduaren oinarri ideologikoak eta helburuak adostasun handiarekin onartu ziren, kideen %85en oniritzia jaso baitzuen “Euskaldunon Elkarteen Oinarriparrak” ponentziak. Dagoeneko dozena erdi dira Topagunean parte hartzen duten Uribe Kosta eta Erandioko euskaldunen elkarteak: Berbalamiñe, Berbots, Bizarra Lepoan, Boluntzarreta, Egizu eta UKBERRI.NET argitaratzen duen Ukberri Uribe Kostako Komunikabide Euskaldunak elkartea. Argazkian, 2011ko maiatzeko batzar orokorrean Rozio Luces Egizu Getxo Euskaldun! elkarteko dinamizatzailea Topaguneko Zuzendaritza Batzordeko kide aukeratu zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun