Presoen alde, bakearen alde edo eskubide politikoen alde Bilbon jende uholde izugarriak osatu baditugu, nola da posible irailaren 22an murrizketen aurka Kale Nagusira 7.000 lagun besterik ez atera izana? Non zeuden Bizkaiko 92.274 langabeak? Non, Bilbo Handiko 869.842 lagunen arteko amorratu guztiak? Noiz demontre beteko dugu Autonomia kalea gure ogiaren alde?
Finean, gizarte-borroka benetan irabazi nahi al dugu?
Koldo Larrea Antxia "Itxina" (Itzubaltzeta / Romo)
I-26ko greba arrakasta borobila izateko arrazoi ugari zegoen arren, nola eta zergatik bihurtu genuen M-29ren murrizketa? Zertarako geure burua saboteatu? I-26ko deialdia zergatik egin zen jendea desmobilizatuen zegoen unean, Greba Batzordeoi oporretatik bueltan hiru aste besterik ez utzirik? M-29ko deialdi bateratuak eragindako ilusioa eta izandako jarraipen zabala ikusirik, sindikatuetako buruek zergatik ez zuten borroka-batasunaren bidean aurrera egin? Sindikatu unionistek berriro greba orokorra deitu beharko dutela sumatu arren, zergatik azken hiru urteotako bosgarren greba orokorra banatuta deitu? Zein da gure greba egutegia gizarte-borroka irabazteko? Hain indartsu bagabiltza, “grebek ezertarako ez dute balio” esaten dutenen argudio faltsuak puztu ordez, zergatik ez greba orokor bateratu eta mugagabea egosten hasi? Greba irmo horretarako zein erronka zehatz luzatuko diogu etsaiari? Argazkian, Itzubaltzeta / Romoko Greba Batzordeak pasa den irailaren 26ko greban egindako manifestazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun