Atzoko ekimena Euskal Eskola Nazionala eraiki bidean kokatu dute ikasleen erakundeko partaideek: "ikasleak bagoaz gure eskola eredua eraikitzera. Subjektu gisa aitortzen gaituen eskola, ikasleon eskubideak bermatu eta gure hitza, besteenaren antzera errespetatu eta kontuan hartuko duten ikastetxeak eraikiko ditugu. Enpresa eta merkatu kapitalistatik interesetatik urrun, herriarekin eta herriaren garapenerako lan egingo duen unibertsitateak errealitate egingo ditugu. Euskaraz ikasi eta bizitzea posible den heziketa eredu bat, parekidetasunean, elkarlanean… ez delako ametsa, ikasleok posible dela erakutsiko dugu!".
Herri eskolak argazkitan (cc-by-sa Ikasle Abertzaleak)
Hispanitatearen Eguna zela eta gorriz markaturiko egutegiari kasurik ez eta "jai arrotzari" muzin egin zion atzo Uribe Kostako hainbat ikaslek. Ikasle Abertzaleek deituta, Uribe Kosta eskualde mailako herri eskolak egin zituzten 40 bat neska-mutilek Getxoko Aixerrota institutuan. Goizeko 10etan ekin zioten egunari gosari gozo eta beroa dela medio. Ezagutza jolasak egin ondoren, hezkuntzan pairatzen ari diren murrizketak izan zituzten hizpide, osoko bilkuran zein lantaldeka. Bi puntu jo zituzten garrantzitsuenak: "Erreformei buruz jendea kontzientziatzeko ze nolako lanketa egin dezakegun ikasleok, subjektu aktibo gisa" eta "Nola egin indar metaketa guztion artean ikasle mugimendu anitz eta indartsua lortzeko". Herri Eskolen egitarauari amaiera emateko, bideo-emanaldia egin zuten, munduko hainbat ikasle mugimenduren zein Euskal Herrikoaren azterketa sakona egiteko, "era indibidualean ikasle mugimenduari ikusten dizkiogun ahulguneak eta indarguneak aipatuz eta ahulguneak indarguneak bihurtzeko zer egin behar dugun ondorioztatuz", Uribe Kostako IAko kideek azaldu dutenez. Argazkian, ikasleak atzoko herri eskoletan sartzeko itxaroten Aixerrotan / cc-by-sa Ikasle Abertzaleak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun