Akarlandatik Martiartuko dorrera arteko bisita gidatua egingo du larunbatean Berbotsek

Larunbat honetarako, urriak 20, etnotoponima txangoa antolatu du Berbots Erandion Euskaraz! elkarteak. Fredi Payak bisita gidatua egingo du Akarlandatik Martiartuko dorrera. Fredi Erandioko baserrietatik ibili zen bertokoei euren istorioak entzuten: aspaldi gertatutako pasadizoak, Erandioko lurretako kontu mitologikoak, tokiko izenen zergatia..., hau da, aitite-amamen istorioak. Autobusez egingo dute joan-etorria: goizeko txangoa izango da, Altzagako metro geltokian 10:00etan geldituko dira eta eguerdian herrira itzuli. Urriaren 28an, berriz, Uribe Kostako altxor geologikoa ezagutzera joango dira, Koldo Nuñez Beteluk lagunduta. Autobusez ere egingo dute: 09:00etan atera eta eguerdian buelta. Aipatu bi ekintzetan parte hartzeko aurretik eman beharko da izena, ondoko helbide elektronikoan: berbots[abildua]gmail.com. Lehenengorako hilaren 17ra arte egongo da horretarako aukera. Gainera, hamaiketakoa eramatea gomendatu dute Berbotsekoek. Argazkian, Martiartuko dorrea / © Erandioko Udala.