Bost zergen inguruan hitz egiteko baldintzak ezarri dizkio Getxoko Bilduk EAJri
Urrian herritarrek ordaindu beharreko bost zerga nagusien inguruan hitz egiteko proposamena ere egin dio EAJren Gobernu Taldeak Getxoko Bilduri. Horien inguruko erabakia urriko udal batzarrean hartu nahi dute, bestela ezin direlako 2013ko urtarriletik aplikatu, zehaztu dutenez. "Bildun argi daukagu zergak eta inbertsioak guztiz lotuta daudela; ezinbestekoa da herritarrek erakundeei ematen dieten dirua herritarren beharrak asetzeko inbertituko dela bermatzea. Are gehiago bizi dugun momentu ekonomikoan", azaldu dute koaliziotik. Horregatik, aipatutako zergen inguruan hitz egiteko prest agertu da Bildu hainbat baldintza jarrita. Besteak beste, "irizpide progresiboak" zehaztea eskatuko diote EAJren Gobernu Taldeari, IBI eta gainontzeko zergetan hobariak eta bestelako neurriak ezarriz, langabezian zein egoera ekonomiko estuan daudenek gutxiago ordaindu behar izateko. Argazkian, Maitane Nerekan eta Bingen Saitua Getxoko Bilduren zinegotziak, gaurko prentsaurrekoan.
Bestalde, udal ordenantza berria onartzea eskatu dute, Aldundiak mugak jartzen dituen zergetan, errenta baxuko familiak eta banakoak lagundu ahal izateko. Azkenik, igoera onartuz gero (Bilduk ez du KPIarena baino handiagoa den igoerarik onartuko), horretatik lortutako diru sarrerak zein gizarte laguntzara bideratuko diren zehaztea galdegin diote Udalari. "Getxoztarrek eta, batez ere, krisi eta murrizketa inposatuen kolpea gogorren sufritzen ari direnek, zerga politika progresiboa merezi dutela argi dugu. Are gehiago, Getxo bezalako herri batean, non gehien daukatenek gehiago ordaindu beharko duten, udal diru sarrerekin guztion oinarrizko beharrak ase ahal izateko", adierazi dute Bildukoek. Momentuz, EAJren erantzunik jaso ez dutela jakinarazi ere egin dute, baina aurrekontu prozesua "gardentasunez" eramateko konpromisoa berretsi dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun