Udal arduradunek diotenez, berritzailea da diseinuari dagokionez, Antsonekoa plazaren ondoko autobus-geltokiaren antzekoa, baina tamainaz handiagoa. Hartan bezalaxe, bere barnean LED argiztapena edukiko du, kontsumo baxukoa eta energetikoki eraginkorra, arrats/gauean argiztatzeko. Markesinaren ondo-ondoan, haizea mozteko hegal bat kokatu da, material berdinak erabilita, atari zabalean zain egotea nahiago dutenak babesteko. Laster banku bi kokatuko dira markesinaren barruan eta beste bi kanpoan, atari zabalean eta hegal horrek babestuta.
Plazatxoa
Urdulizko Udalak bere jabetzazko lursail bat laga du geltokia eta alboko urbanizatzea egi bihurtzeko. Markesina 150 metro koadroko plaza batean kokatu da. Errepideak espaloiaren tartetxo bat bereganatu du autobusaren aparkalekua ezartzeko, hau da, autobusarentzako sarreratxo bat finkatu da modu erosoan aparkatu ahal izateko eta trafikoa ez oztopatzeko.
Plaza txikian laster bizikletentzako aparkalekua jarriko da, baita paperontzi bat ere. Gainera, geltokiaren atzealdean eta hegalean geratu den lurrezko ezpondan, Udalak 10 zuhaitz landatuko ditu, gune berde bat sortuz. Berdeguneak mantenurako sistema izango du, automatikoki ureztatzea ahalbidetuz. Urdulizko Udalak, guztira, 77.000 euro inbertitu ditu proiektu hau aurrera eramateko.
Hala urduliztarrek, nola herrira autobusez gerturatzen direnek, geltoki berria izango dute eskura hemendik hilabetera Aita Gotzon kalean, metroaren geltokitik abiatuz, esaterako, udaletxerako noranzkoan errepidetik joanda. Geltoki berri hori udaletxeari egokituko zaio. Izan ere, udaletxeko plazatik 30 metro eskasera kokatzen da eta 50 metrora eraikin kontsistorialetik. Udaletxetik gertu, zehazki bere aurrean eta 40 bat metrora, bada dagoeneko autobusentzako geraleku bat baina errepidearen bestaldean dago eta, hortaz, trafikoaren kontrako noranzkoari dagokio. "Orain, Udalaren ekimenari esker, noranzko biek ere geraleku bana izango dute udaletxean", adierazi dute tokiko iturriek. Geltoki berria eraikitzeko lanak laster amaituko dira. Izan ere, jada kokatuta dago beirazko pabesadun markesina, altzairu herdoilgaitzezko egitura baten gainean egina. Argazkia: © Urdulizko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun