Ertzaintzak 45 urteko gizonezko bat atxilotu zuen atzo arratsaldean, sexu eraso eta genero indarkeria delituak leporatuta. Eusko Jaurlaritzaren Herrizaingo Sailak zabaldu duenez, Plentziako Gurutze Gorriak Ertzaintzari jakinarazi zion atzo emakume bat bertaratu zela, bikotekide ohiak eraso egin ziola esanez. Gurutze Gorrira joan ziren agenteak biktimarekin hitz egiten hasi ziren, eta hark azaldu zienez, mutil-lagun ohiak bere ibilgailura sartzera behartu zuen, eta Bakioko begiratoki inguruko zelai batera eraman zuen. Bertan zirela, sexu eraso behartuak izaten saiatu zen, baina neskak uko egin zion. Borroka egin eta gero, biktimaren jarreraren ondorioz bikotekide ohiak tokian abandonatuta utzi zuen, eta sakelako telefonoa kendu zion, poliziari abisatzea eragozteko. Gertatutakoaren berri izan ondoren, ertzainek ustezko autorea atxilotzeko beharrezko eginbideak martxan jarri zituzten; atzo, 19:00etan, ustezko erasotzailea Neguriko ertzain-etxeko polizia bulegoetan bertaratu zen, bikotekide ohiaren aurkako salaketa aurkezteko. Orduan atxilotu zuten. Argazkian, emakumeenganako indarkeriaren kontrako elkarretaratzea eskualdean, artxiboko irudian.
Polizia iturriek diotenez, emakumeak kontusio ugari zituen gorputz osoan, baina errepidera arte oinez joan zen; iritsitakoan, inguru hartan zebilen gidari bati laguntza eskatu zion, eta Plentziara eramateko eskatu zion. Herritarra laguntzeko prest agertu zen eta Gurutze Gorriko postura eraman zuen. Bertan artatu zuten, eta ondoren, ospitale batera eraman zuten. Horrez gain, emakumeak agenteei jakinarazi zienez, egun batzuk lehenago bikotekide ohiak konbentzitu egin zuen hitzordua haien arteko harremanari buruz hitz egiteko elkar zitezen; etxean zeudela, baimenik gabeko sexu harremanak izatera behartu zuen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun