Imanol Landa Getxoko alkateak bere doluminak helarazi dizkio Ildefonso Jimenezen seme-alabei, beren aitaren heriotza ekarri duen "zoritxarreko gertaera" dela eta. Halaber, gertakari horiek gogor gaitzetsi ditu, familiaren esanetara jartzearekin batera, behar duenarentzat. Era berean, Landak lasaitasun mezua zabaldu nahi izan die getxoztarrei, “nahiz eta 2012an ondarearen aurkako delituen gorako joera ikusten den, herrialde osoan bezala, ziurrenera krisiaren eraginez, Getxon delinkuentzia maila inguruko herrietakoa edo Bizkaiko eta estatuko beste udalerrietakoa baino askoz txikiagoa baita”. Ertzaintzak atzo aurkitu zuen Algortako Ollarretxe kalean 83 urteko gizonaren hilotza. Gorpuak indarkeri-zantzuak zituen, eta, dirudienez, gizonak labankada bat jaso zuen lepoan. Argazkian, Ollaretxe kaleko 11. zenbakian izan zen gertaera.
"Oraindik goiz den arren, zenbait hipotesi darabiltelako, eta gertaera larria bada ere, itxura guztien arabera, kasu zehatz eta bakana baino ez da, ez baita ohiko jokatzeko modua etxeetan egindako lapurretetan", gaineratu du alkate getxoztarrak. Gainera, Landak, Udaltzaingoak eta Ertzaintzak batera egiten duten etengabeko lana azpimarratzeari utzi gabe, Tokiko Segurtasun Batzordea (Udaltzaingoa eta Ertzaintzaren arteko koordinazio organoa) deituko duela iragarri du, gertakari larri honen inguruan Ertzaintza egiten ari den ikerketa, eta, behar izatekotan, laguntza indartzeko har litezkeen neurriak ezagutzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun