Emakumeenganako indarkeriaren kontrako murala pintatuko dute bihar Gorlizko 15 gaztek baino gehiagok
Gorlizko Udal Gaztelekuko 12 eta 18 urte bitarteko 15 gaztek baino gehiagok komiki-bineta handi bat sortuko dute ostiral honetan, urriak 19, 17:00etatik aurrera, horma-irudi formatuan, Beldur Barik programaren “Komiki Mundiala” ekimenaren barruan. Murala hondartzako horma batean margotuko dute, Aretza kaleko 9. eta 12. zenbakien artean, Plentziako mugan. 2-3 metroko garaiera eta 7-8 metroko luzera izango du. Aurretik, bii asteburu ondoz ondokotan (ostiraletik igandera) landu dute proiektua. Beldur Barik programaren aurreko edizioetako ikus-entzunezko lehiaketan irabazle izandakoen lanak aztertu dituzte eta emakumeen kontrako indarkeria ezari buruz gogoeta egin dute. Horma-irudian berdintasunaren aldeko jarrerak eta indarkeria matxistaren prebentzioa landuko dituzte, Picassoren Gernika eta Pop Art mugimendua eta Andy Warhol artista oinarri dituztela. Argazkian, Beldur Barik egitasmoaren gaineko horma-irudi bat / © Beldur Barik.
Datozen asteetan, azaroaren 12ra bitartean, hiru lurraldeetako beste hainbat udalek ekimenean hartuko dute parte, euren horma-irudiak sortuz. EAEko hainbat udalerriren artean komiki handi bat sortzea da “Komiki Mundiala” ekimenaren asmoa, eta aurten sortutako spotaren istorioa izango du oinarria. Bi helburu hauek lortu nahi izan ziren, hain zuren ere, spot horren bitartez: "Beldur Barik jokabideak gazteengana hurbiltzea eta, komikiaren estetikaren bitartez, emakumeen jabekuntza sustatzea, eguneroko bizitzako alderdi guztietan", Bizkaiko Foru Aldundiak adierazi duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun