Leioan "Jagolearen etxea" bezala ezaguna den etxetxoa berritzeko proiektua du Udalak, Eneko Arruebarrena alkateak iragarri duenez. Langileria 202. zenbakian, Artatza Jauregiaren atzeko aldean dagoen eraikina moldatzea eta erabilera publikoa ematea da asmoa. "Udalaren asmoa zonalde horretako udal bulego deszentralizatua bertan ezartzea da, eta honetaz gain bestelako ekipamendu bat ezartzea bertan herritarrei zuzendutakoa", zehaztu du agintari leioaztarrak. Berrikuntza lanek eraikinaren berezko estetika mantenduko dute, eta bide batez, atzeko aldean zati berria gehituko zaio eraikinaren edukiera zabaltzeko asmoz. Horrela, eraikin berriztatu osoaren azalera 150 metro koadro baino gehiagokoa izango da, erabilera nagusi bitan banatuta. Alde batetik, 60 metro koadroko azaleran bulego administratiboa ezarriko da. Zehazki gaur egun Pinueta auzoan dagoen bulegoa, hau da, udal tramiteak egiteko zonaldeko herritarrek erabiltzen duten bulegoa. Bigarren erabilera txokoarena da. Eraikinaren 90 metro koadro herritarren erabilerarako zuzendutako auzoko txoko izango da. Sukaldea eta jantokia prestaturik edozein leioaztarrak, eta bereziki zonaldekoek, txoko hau erabiltzeko aukera izango du bazkariak, ekintza gastronomikoak edota sozialak egiteko. Modu honetan, Leioako hegoaldeko biztanleek iparraldekoek duten San Bartolomeko txokoaren antzeko udal zerbitzu batez gozatzeko aukera izango dute. Argazkian, Eneko Arruebarrena Leioako alkatea.
Antzinean Artatza Jauregiko parte izan zena eta egun Leioako ondare historikoa osatzen duen eraikin historikoa hiru auzo leioaztarren artean kokatzen da, Lamiako, Pinueta eta Ibaiondo artean, hain zuzen ere, Gaztelubide biribilgunearen parean. "Eraikuntza lanak ohiko sistemak erabiliz egingo dira, baina eraikina egin ostean jasangarriak diren hainbat sistema teknologiko ezarriko zaizkio eraikin berriari", Arruebarrenaren arabera. Lanak zonaldeko egokitze lanekin borobilduko dira, zonaldeko urbanizazioa eta moldatu berri dagoen Dolores Ibarruri plazaren eta Gaztelubide parkinaren loturekin. Eraikina lurzorua baino gorago kokatuko da terraza baten bidez, nagusitasuna emateko. Gainera, pergola bat gehituko zaio, eta nola ez, berde gunea eta hainbat zuhaitz. Guztira "500.000 euro baino zeozer gehiago" jarriko du Udalak proiektua aurrera ateratzeko, eta eraikin historiko hori herritarren esku jartzeko. Lanak urte honen amaieran hasiko dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun