Goiriena EHUko dekano ohiari bost urteko zigorra ezarri dio Bizkaiko Probintzia Auzitegiak
Francisco Javier Goiriena EHUko Medikuntza Fakultateko dekano ohiari eta Monserrat Barranquero Estomatologia Departamentuko zuzendariari bosna urte eta hiru hilabeteko kartzela zigorra ezarri die Bizkaiko Probintzia Auzitegiak, baita 9 urteko inhabilitazioa ere, funts publikoak bidegabe erabiltzeagatik eta dokumentu publikoak faltsutzeagatik, besteak beste, Berria.info agerkari digitalak zabaldu duenez. Gainera, 168.000 euro ordaindu beharko dizkiote unibertsitateari erantzukizun zibilagatik. Horren aurrean, adierazpena plazaratu du Euskal Herriko Unibertsitateak. Tokiko agintariek adierazi dutenez, "EHUk beti errespetatu ditu organo judizialean erabakiak eta, oraingoan ere, hala egingo du". Are gehiago, uste dute Bizkaiko Probintzia Auzitegiaren epaiak berretsi egiten duela Euskal Herriko Unibertsitatearen jarrera, "Fiskaltzak eta herri akusazioak ere izan dutena". "Akusatuek unibertsitateari erantzukizun zibila ordaindu behar izateak erakusten du unibertsitateko agintariek behar den moduan babestu dituztela erakundearen ondasunak eta eskubideak", gaineratu dutenez.
Unibertsitateko arduradunen arabera, "erantzukizun instituzionalaren printzipioa eta legea betetzea" izan dira beti Euskal Herriko Unibertsitatearen gidariak. Ildo horretan, "Unibertsitateak delitu zantzuak ikusi zituen pertsona batzuek Estomatologia Sailean egindako gestio lanetan, eta berehala eman zion gertaera horien berri Fiskaltzari. Ordutik hona, erakunde akademikoak behin eta berriz berretsi du salaketa hori kasuan kasuko organo judizialetan. EHUk jarrera koherentea izan du, betiere erakundearen interesak zainduz eta erakundearen ondasunak eta eskubideak babestuz. Horixe izan da bere jarrera hamabi urtean, unibertsitatea hiru errektorek zuzendu duten hiru agintalditan zehar", azaldu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun