Lehendakaritzan, Emaitzak Aurkezteko Zentro Ofizialean egin dute agerraldia 18:00etan Raul Fernandez de Arroiabe Eusko Jaurlaritzako Herrizaingo sailburuordeak eta Sonia Fernandez Hauteskunde Administrazioko zuzendariak. Bertan eman dituzte 17:00ak arte izan diren parte hartze indizeei buruzko datuak. Ordu horretara arte, Eusko Legebiltzarreko gaurko hauteskundeetan bozkatzeko aukera duten EAEko 1.775.336 biztanleen %47,21k emanda zuen botoa, 2009an baino %1,61 gutxiagok, Fernandez de Arroiaberen arabera. Lurraldeen arabera, Bizkaian zen parte-hartzerik handiena: %47,94, hain zuzen ere. Duela lau urteko hauteskundeak baino %3 txikiagoa, baina. Gipuzkoari dagokionez, 17:00ak arte, hautesleen %46,97k eman du botoa; 2009an baino %0,93 gehiagok, beheranzko joera apurtuz. Azkenik, Araban, %45,03koa zen parte-hartzea aipatu orduan; duela lau urte baino %2,08 txikiagoa. 20:00etan itxiko dituzte hauteslekuak. Herrizaingo sailburuordeak eguerdian esan duenez, parte hartzearen beherakadan "eguraldi kaskarrak eragina izan dezake, beste faktore batzuen artean". Argazkian, Herrizaingo sailburuordea eguerdiko prentsaurrekoan / cc-by Irekia.net - Eusko Jaurlaritza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun