"Euskaraz, zergatik ez?" aita-amentzako tailerra izango da ostiralean Algortan
Topagunearekin elkarlanean, "Euskaraz, zergatik ez?" egitasmoa ekarriko du Algortara Bizarra Lepoan euskara elkarteak. Gauzak horrela, aita-amentzako tailerra egingo dute ostiral honetan, urriak 26. Hitzordua 17:00etatik 19:00etara izango da, Martikoena kaleko 16. zenbakiko lehenengo solairuan eta doan. Haurtzaindegi zerbitzua ere egongo dela jakinarazi dute euskara elkartekoek. Hartara, umeekin joan nahi dutenek begirale gune bat izango dute haiek zaintzeko. Hori bai, parte-hartzea ahalik eta lasterren konfirmatzea eskatu dute: 688 606 346 (Eleder) / 665 758 031 (Itxaso). "Euskaraz, zergatik ez?" tailerra euskararen erabilera sozialaren inguruan hausnartzeko saioa da. "Tailer honetan hizkuntzaren aldeko argudioak eskaintzen dira eta; aurrez aurreko elkarrizketetan hizkuntzari eusteko teknikak baino, hausnarketarako arrazoiak eta gakoak lantzen dira", azaldu dute Bizarra Lepoanekoek. Argazkian, ume eta gurasoak 2009ko azaroan Xirula-Mirulako lagunekin egindako dantzaldian / cc-by Egizu Getxo Euskaldun!
Euskara ezagutu arren, erabilera gune, harreman eta arloak irabazteko dituzten euskal hiztunentzat zuzenduta dago; hau da, euskaldun gehienentzat datuen arabera (egun, Euskal Herrian euskara ezagutzen dutenen erdiak baino ez du erabiltzen). Besteak beste, hizkuntzekin duten harremanaz hausnartu nahi duten gurasoak, irakasleak, begiraleak... Proiektua Kataluniako Tallers per la Llenguak diseinatutako Taller per al foment dels Usos Interpersonales en Llengua Catalana tailerrean du oinarri. Topaguneak hura hartu, moldatu, egokitu eta euskarara ekarri du, gure hizkuntzak bizi duen errealitatera egokituz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun