EAJk eta Bilduk "zergak igotzeko hitzarmena" adostu dutela adierazi du gaur Getxoko PPk. Marisa Arrue popularren bozeramailearen arabera, "bigarren urtez jarraian, %3,1 igo nahi dituzte Ondasun Higiezinen gaineko Zerga, Zirkulazio Zerga eta Jarduera Ekonomikoen gaineko Zerga". Bere ustez, "krisialditik irteteko modua ez da bizilagunak estutzea, horietako batzuk hilabetea bukatzera ere ezin direnean heldu. Konponbidea da behar-beharrezkoak diren kontuetan gastatu eta enpresei laguntzea, horiek enplegua sor dezaten". Arrueren hitzetan, iaz "37,4 milioi euro soberan" izan zituen Udalak, beste "40 milioi euro banketxeetan" sartuta ditu eta "7 milioi euro kobratzeke". Hori dela eta, balizko zergen igoera ez du babestuko Getxoko PPk, hilaren 30eko udal batzarrean. Are gehiago, horiei zuzenketak egingo dizkio, "getxoztarrak lagunduko dituzten hobariak ezartzeko". Argazkian, orain astebete bost zergen inguruan hitz egiteko baldintzak ezarri zizkion Getxoko Bilduk EAJri, tartean IBI eta gainontzeko zergetan hobariak eta bestelako neurriak ezarriz, langabezian zein egoera ekonomiko estuan daudenek gutxiago ordaindu behar izateko.
EAJren Gobernu Taldeak urrian herritarrek ordaindu beharreko bost zerga nagusien inguruan hitz egiteko proposamena egin ziola jakinarazi zuen orain astebete Getxoko Bilduk. Koaliziotik azaldu zutenez, "Bildun argi daukagu zergak eta inbertsioak guztiz lotuta daudela; ezinbestekoa da herritarrek erakundeei ematen dieten dirua herritarren beharrak asetzeko inbertituko dela bermatzea. Are gehiago bizi dugun momentu ekonomikoan". Horregatik, aipatutako zergen inguruan hitz egiteko prest agertu zen Bildu hainbat baldintza jarrita. Besteak beste, "irizpide progresiboak" zehaztea eskatuz EAJren Gobernu Taldeari, IBI eta gainontzeko zergetan hobariak eta bestelako neurriak ezarriz, langabezian zein egoera ekonomiko estuan daudenek gutxiago ordaindu behar izateko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun