Lan horiek amaitu aurretik hasiko dira 4B (fatxada eta instalazioen eraikitzea) eta 4C (akaberak) faseetakoak ere. Hori guztia osotuko dute inguruko guneak urbanizatzeko dagoeneko egiten ari diren jarduerarekin. Horren adibidea da Andres Kortina kalearen urbanizazioa, amaituta dagoena. Bestalde, Getxo Antzokiaren eta Musika Eskolaren eraikin berrietako solairuen egitura metalikoa bere tamaina osora iritsi da jada, udal arduradunek aipatu dutenez. Bakarrik estalkiko xehetasun batzuk daude egiteke, horiek egiteko hurrengo faseko lan jakin batzuk egin behar direlako lehenago.
Gero eta hurbilago
“Etorkizunean arteentzat Getxok izango duen gunea gero eta hurbilago dago getxotar guztien nahia, ikusleena zein artistena, egi bihurtzeko, kulturgintzaren adierazpen guztiek eskaintzen diguten guztiarekin gozatzeko eta hunkitzeko espazio baten zain baitaude”, azpimarratu du Imanol Landa Getxoko alkateak. Udal agintariak aipatu du kultura eta arteen zentro berria aurreikuspenak betetzen ari dela, lanak aurrera doazela proiektuaren azken txanpan egoteraino “eta horrek, gure herriko aberastasun kulturala bultzatzea eta babestea ahalbidetuko du, hain zuzen ere, kulturaren mundua jasaten ari den une hain larri batean”.
Azaroan hasiko dira Getxo Antzokiko estalkiak, instalazioak eta zatitzeak egiten
Udal Gobernu Batzordeak Getxo Antzokia eta Musika Eskola eraikitzeko proiektuaren 4A faseko lanak esleitu ditu gaur goizean, kultur zentro berria eraikitzeko prozesuaren azken-aurreko fasea, alegia. Esleipena 3,9 milioi eurotan egin dute, hau da, "proiektuan jasotako aurrekontua (6 bat milioi) baino %34 merkeago", tokiko iturriek adierazi dutenez. Horrek, hasiera batean, 2 milioi euro inguruko aurrezpena suposatuko du udal diru-kutxarentzat. Fase berri horretako lanak eraikineko instalazioen %60 dira, gutxi gorabehera, eta honako egintza hauek jasotzen dira bertan: estalkiak (Getxo Antzokiko eta Musika Eskolako goi aldeko elementu horizontal guztiak egokituko dira baita plaza berriko lur azpiko estalkia), instalazioak (airea girotzekoa, argindarra, telekomunikazioak, saneamendua, iturgintza, eta suteen aurkako babeserako sare eta azpiegiturak, besteak beste) eta zatitzeak (barrualdeetako banaketa eta trenkada-multzoak). Etapa berria azaroaren hasieran abiatuko dute eta urtebeteko epea izango dute lanak amaitzeko, horien zuinketatik hasita. Argazkian, Imanol Landa alkatea eta Joseba Arregi Hirigintza zinegotzia uztailean emandako prentsaurrekoan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun