Hilero, urritik maiatzera, Cinema Paradiso zikloko filmak eskainiko dira lehenengo hamabostaldian, jatorrizko azpitituludun bertsioan. Bigarren hamabostaldian, berriz, lekukoa Zine-Kluba ziklora pasatuko da. Ziklo horietako proiekzioak ostiraletan izango dira, 21:00etan. Igandeko Haur Zinemari dagokionez, gaztetxoek igandero gozatu ahal izango dituzte beren film gustukoenak, 17:00etan. "Aurten Getxoko zinema zikloek eskaintza anitza izango dute. Horrela, zirkuitu komertzialeko kalitate eta balio artistiko handieneko filmak eskainiko dira; ekoizpen independenteak eta ohiko zirkuituetatik kanpo dauden luzemetraiak, berriz, Cinema Paradison eskainiko dira. Azkenik, haur eta gazteentzako filmak Igandeko Haur Zinema zikloan proiektatuko dira, haurrek zinema onenaz asteburuan goza dezaten", azaldu dute tokiko kultur iturriek. Cinema Paradiso eta Zine-Kluba zikloetan ez dira proiekzioak eskainiko soilik. Ohi bezala, zinemari buruzko foruma egongo da filma amaitu ondoren eta horretan, nahi duten ikusle guztiek parte ahal izango dute.
Azaroko emanaldiak
Azaroan, honako film hauek proiektatuko dira Zine Kluba eta Cinema Paradiso zikloetan: "Ellas" (hilak 2; zuz.: Malgoska Szumowska), "Chloe" (hilak 9; zuz.: Atom Egoyam), "Un dios salvaje" (hilak 16; zuz.: Roman Polanski), "Arrugas" (hilak 23; zuz.: Ignacio Ferraras) eta "La voz dormida" (hilak 30; zuz.: Benito Zambrano). Igandeko haur zineman, berriz, "The Wish Fish" (hilak 4; euskaraz) eta "Las aventuras de Tadeo Jones" (hilak 18). Txartelak 2,90 eurotan egongo dira.
Ostiralean hasita, urriaren 26an, zinemazale getxoztarrek berriro ere gozatu ahal izango dute Zine-Kluba, Cinema Paradiso eta Igandeko Haur Zinema zikloez, Getxoko Kultur Etxeak jakinarazi duenez. Ohi bezala, proiekzioak Areetako Andres Isasi Musika Eskolan izango dira. 2012-2013 zine denboraldia "Los idus de marzo" filmaren proiekzioarekin abiatuko da. George Clooney zuzendari eta protagonista duen thriller politiko hori Beau Willimon idazlearen "Farragut North" eleberrian oinarrituta dago eta Estatu Batuetako hauteskunde primarioen egitura nahasi eta susmagarria agerian uzten du. Saioa 21:00etatik aurrera izango da, gaztelaniaz, eta sarrera 2,90 eurotan egongo da. Igandean, urriak 28, gaztetxoek "Ice Age 4" filmaz gozatzeko aukera izango dute espainolez, 17:00etatik aurrera, 2,10 euroren truke. Animazio saga dibertigarri horren laugarren istorioan animalia protagonistek abenturak biziko dituzte lur-mugitzez beteriko garaian. Argazkian, txikiek "Ice Age 4" filma izango dute igandean / cc-by kroszka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun