Martxelo Alvarez Ahaztuak 1936-1977 elkarteko kidearen arabera, Oroitzapen Historikoaren Legea aplikatzeko ebaluazio batzordeak 2010ean hartutako erabakia "surrealista bezain lotsagarria" da. "Poliziek tiroz hil zutenean, manifestazioan egon beharrean, balkoitik begira zegoela" erabili zuten argudiotzat, Anton Fernandezi frankismoaren biktima izaera ukatzeko.
"Gabarra Baltza, Erandio bidean" dokumental laburra (cc-by-nc-nd Ander Benito, Asier Borinaga, Mikel Dominguez, Libe Lombraña, Liher Puente eta Naia Uribarri
Astelehen honetan, hilak 29, Polizia frankistak eraildako Anton Fernandez altzagarra eta Josu Murueta astrabuduarra oroituko dituzte Erandion, gertakari lazgarriaren 43. urteurrenean. "Omenaldirik onena, justizia" lelopean, Ahaztuak 1936-1977 elkarteak Obieta kaleko 8. zenbakian, bi biktimak oroitzeko jarritako plakaren ondoan, arratsaldeko 8etan. Ekimen horren bidez, "egia, erreparazioa eta justizia" aldarrikatu nahi dute. Bestalde, EHUko Ikus-Entzunezko sei ikaslek 2010ean filmatutako "Gabarra Baltza, Erandio bidean" dokumental laburra zabaldu dute. 1969ko urriaren 28ko gauean Francoren poliziaren bala batek Anton Fernandez altzagarraren burua jo zuen, garai horietan erandioztarrak itotzen ari zen kutsaduraren kontrako protestetako bati etxeko balkoitik begira ari zela. 15 egunez koman egon ostean, ospitalean hil zen. 29an, goizez, 2.500 langile baino gehiago kalera irten ziren protesta egiten jarraitzeko asmoz. Orduan 31 urte zeuzkan Josu Murueta astrabuduarra sabelaldean tiro bat hartuta hil zen, gau horretan bertan. 43 urte luze igaro dira jada eta, Muruetari ez bezala, Fernandezi ez diote oraindik frankismoaren biktima izaera zein dagozkion eskubide guztiak aitortu. Argazkian, Anton Fernandez eta Josu Muruetaren erretratuak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun