Etxe Sorginduari "behingoz" erabilera ematea eskatuko du gaurko udal batzarrean Getxoko PPk
Algortako Basagoiti Etorbideko 20. zenbakian dagoen Etxe Arrosa edo Etxe Sorginduaren aurrean eman zuen prentsaurrekoa joan den ostiralean Getxoko PPk, Udal Gobernu Taldeak "baliabide publikoekin egiten ari den diru-zarrastelkeria eta kudeaketa kaskarra" salatzeko asmoz. Marisa Arrue tokiko popularren bozeramaileak azaldutakoaren arabera, "EAJk 30 urtez utzi zuen hondamen egoeran aipatu etxea. Ondoren, bost urte iraun zuten erreforma lan handiak egin zituen, horrek Udalari ekarri zion kostu ikaragarriarekin. Bada, obrak amaitu zirenetik ia bi urte —berrikuntza lanak 2011ko martxoan amaitu zituzten— igaro direnetik, erabilgarritasunik ez dio eman Udalak eraikinari". Egun Etxe Sorginduak dakartzan gastuekin (argia, ura, mantenua...) kezkatuta daude popularrak. Arruek aipatu zuenez, "urtean 2.400 euro inguru gastatzen ari dira erabiltzen ez den igogailuan". Hori dela era, gaurko osoko bilkuran mozioa aurkeztuko du Getxoko PPk, Etxe Sorginduari erabilpen publikoa eman diezaioten, ahalik eta lasterren herritarrei zerbitzu emateko. Argazkian, Marisa Arrue eta Eduardo Andrade Getxoko PPko zinegotziak Etxe Sorginduaren aurrean.
PPkoek diotenez, "hasieran onartutako aurrekontutik %40 gehiago bideratu zen obretara, 400.000 euro baino gehiago. Gauzak horrela, 2001ean erreforma proiektua enkargatu zuten 19.441, 54 eurotan; baina horrek ia 20 milioi euro galtzeko baino ez zuen balio izan; erreforma 2007ra arte ez baitzen hasi, 1.213.572,18 eurotan esleituz. 2011ko martxoan amaitu zituzten lanak eta altzarietan 400.000 euro gehiago gastatu zituzten". Gogoratu behar da eraikina konpondu behar zuen enpresarekin zeukan kontratua amaitutzat eman zuela 2008ko urrian Getxoko Udalak, obrak agindu zitzaizkion sozietateak zegozkion denbora epeak bete ez zituelako, tokiko agintarien arabera. Aipatu enpresako arduradunek ordainketak eten egin zituzten eta, ateak itxi ala ez, administratzaile judizialen eskuetan utzi zuten azken erabakia. Horren aurrean, Gobernu Batzordeak, aipatu lanak ahalik eta lasterren berriz hasteko asmoz, horien ardura zuen enpresarekin zuen harremana amaitutzat jotzea erabaki zuen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun