Euskal Herriko Monarch! taldeak nazioarteko grina dauka, eta Baionatik erraz egin du jauzia mundura, doom eta drone soinuak, besteak beste, Bretainian, Ingalaterran, AEB-n, Kanadan, Australian eta Zeelanda Berrian barreiatzen. Erromari dagokionez, Donostia izan du sorburu eta "zarata eta kristauen aurreko akordeak" dauka aurkezpen hitz gisa.
AEBko ordezkaritza, Barn Owl bikotea edo Evan Caminiti eta Jon Porras musikariak, San Frantziskotik datoz eta drone doinuen mugetan dabiltza. Black Sabbath-en herentzia nabari daiteke haien gitarrak eta teklatuetan.
Cuzo Bartzelonako hirukoteak ere 1970ko rock progresiboan, krautrockean eta psikodelian oinarritzen du bere soinua. Azkenik, Your Highness Flandriako bigarren hiria den Anberesetik datoz.
Azken urteotan Amerikako Estatu Batuetatik Euskal Herrira hedatutako Halloween festa ospatuko du gaur eskualdean makina bat tabernak eta koadrilak, batez ere nerabeak, iratxoz, kalabazaz, sorginaz edota mamuz jantzita. Jatorri irlandarra duen ohitura hori aurretiko beste jai bat du sorburu: Samhain ("Udaren Amaiera", Irlandako gaelikoz) jaialdia, edo iluntasuna ekartzen zuen zelten Urtezahar Eguna, alegia. Urte batetik bestera igarotzeaz gain, Samhain gaua mundu honetatik bestera jauzia emateko aukera zela uste zuten zeltek. Aipatutako festan oinarrituz, kontzertu iluna eskainiko du gauean Astrabuduako Sonora diskotekak. Bertan, 21:00etatik aurrera eta 10 euroko sarrera ordainduz gero, Barn Owl banda estatubatuarra, Cuzo hirukote katalana, Flandriako Your Highness taldea, Monarch! baiondarrak eta Erroma talde donostiarra ikusi ahal izango dira Live Bar aretoan, doom, drone, psikodelia eta bestelako doinu ilunak eskainiko dituztela. Argazkian, Emilie "Eurogirl", Monarch!-en abeslaria / © Monarch!
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun