Euskararen gizarte erabilera babestu, sustatu edo hedatzeko zereginetan nabarmendu diren erakunde, elkarte edo pertsona fisiko nahiz juridikoak goraipatzeko helburuarekin, Getxoko Udalak Argia Ereiten Getxoko Euskara Sariaren hirugarren edizioa jarri du martxan. Ostiralera arte, hilaren 9ra arte, zabalik egongo da hautagaiak aurkezteko epea eta proposatu ahal izango direnak banakoak, taldeak, elkarteak edo kolektiboak izan daitezke, beti ere getxotarrak edo Getxon finkatutakoa bizitzaz nahiz jardunbidez badira. Getxoko Udalak saria emateko kontuan hartuko ditu proposatutako lan edo jardueraren kalitatea eta esanahia, euskararen normalkuntzan egindako ekarpena eta orain arteko ibilbidea. Sarirako hautagaiak euskalgintzako elkarteek, euskaltegiek, ikastetxeek, banakoek edo Udal Euskara Zerbitzuak aurkez ditzakete. Hautagaiak aurkezteko inprimakia www.getxo.net web gunetik deskargatu eta euskara.zerbitzua[abildua]getxo.net posta elektronikoaren helbidera bidali behar da. Argazkian, pertsona bat Argia Ereiten sariaren ikurrari so.
Udalak zabaldutakoaren arabera, saria nori eman erabakiko duen epaimahaia Imanol Landa alkateak, Koldo Iturbe Euskara zinegotziak, Getxoko Aholku Batzordeko 12 kideek eta Euskara Zerbitzuko teknikari batek osatuko dute. Luis Artola artistak egindako egurrezko eskultura azaroaren 28an emango dio irabazleari Getxoko alkateak, Faduran egingo den ekitaldi publikoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun